छत्रपती संभाजीनगर : छत्रपती संभाजीनगर महानगर प्रदेश विकास प्राधिकरणाच्या विविध प्रकल्प आणि योजनांच्या अंमलबजावणीचा सविस्तर आढावा विभागीय आयुक्त तथा महानगर आयुक्त जितेंद्र पापळकर यांनी घेतला. प्राधिकरण क्षेत्रातील कामकाज अधिक गतीमान व पारदर्शक होण्यासाठी विविध संस्थांनाच्या प्रतिनिधीशी त्यांनी संवाद साधला.

 विभागीय आयुक्त कार्यालयात झालेल्या बैठकीस महानगर नियोजनकार हर्षल बाविस्कर, सह महानगर नियोजनकार रवींद्र जायभाये, नगर रचना तज्ज्ञ सुनील सुकळीकर यांच्यासह  प्राधिकरण क्षेत्रात कार्यरत वास्तुविशारद, अभियंता, सर्वेअर संघटना, मसिआ, क्रेडाई, आयआयए यांसह संबंधित संस्थांच्या प्रतिनिधींशी सविस्तर चर्चा करण्यात आली. प्राधिकरणाच्या माध्यमातून राबविण्यात येणाऱ्या विकास कामांबाबत सूचनांची देवाणघेवाण तसेच आवश्यक सुधारणे संदर्भातही चर्चा झाली.

 प्राधिकरण क्षेत्रात हस्तांतरणीय विकास हक्क (TDR) लागू करण्यास प्राधिकरणाच्या कार्यकारी समितीने 17 ऑक्टोबर रोजीच्या बैठकीत मंजुरी दिली आहे. डीपी रस्ते व आरक्षणामुळे बाधित जमिनीचे हस्तांतरण करणाऱ्या जमीनमालकांना प्राधिकरणामार्फत टीडीआर जारी करण्यात येणार असून, त्यामुळे विकासकामांना आवश्यक गती मिळण्यास मदत होणार आहे.

 युडीसीपीआर 2020 च्या विनिमय 11.2 मधील तरतुदीनुसार टीडीआर जारी केला जाणार असून विकास योजना मंजूर झालेल्या प्राधिकरण क्षेत्रातून टीडीआर निर्मिती केली जाणार आहे. टीडीआर प्रदान करण्याची प्रक्रिया छत्रपती संभाजीनगर महानगरपालिकेमध्ये सध्या अवलंबिली जाणारी प्रक्रिया याच धर्तीवर असणार असून जमीनमालकांना मंजूर टीडीआरचा वापर प्राधिकरण क्षेत्रात करता येणार आहे. विभागीय आयुक्तांनी प्राधिकरणाच्या कामकाजामध्ये गती, पारदर्शकता आणि नियोजनशिस्त राखत विकास प्रकल्प वेळेत पूर्ण करण्यावर भर देण्याच्या सूचना दिल्या. प्राधिकरण क्षेत्रातील नागरिकांना दर्जेदार सुविधा व नियोजित विकास देणे हे प्राधिकरणाचे सर्वांत महत्त्वाचे ध्येय असल्याचेही त्यांनी स्पष्ट केले.