पुणे–पिंपरी चिंचवड शहरात सोमवारी झालेल्या मुसळधार पावसाने पुन्हा एकदा सिद्ध केले की, आपल्या शहराचे नियोजन कागदावरच आहे. रस्ते तळे झाले, खड्ड्यांनी गाड्या गिळल्या, वाहतूक ठप्प झाली, अपघात झाले आणि नागरिकांचा वेळ, पैसा, जीव धोक्यात आला. प्रश्न असा – हे नेमके किती दिवस चालणार?

जुलै महिन्यात पावसाच्या पहिल्याच सरींनी रस्त्यांची अवस्था उघडकीस आणली होती. त्यावेळी काही वरिष्ठ नेते सकाळी सकाळी धावती भेट देऊन ‘शो’ करून गेले. कॅमेऱ्यांसमोर नारळ फोडले, प्रशासनावर ओरडल्याचा आव आणला आणि निघून गेले. नागरिकांच्या आशा पुन्हा एकदा मोडीत निघाल्या. कालच्या पावसाने त्यांच्या सर्व दिखाऊ कामांची पोलखोल झाली.

वाकड–किवळे सेवा रस्ता : नागरिकांची दहा वर्षांची कैद

पिंपरी चिंचवडमधील वाकड–किवळे सेवा रस्ता हा गेल्या दहा वर्षांपासून नागरिकांच्या दुर्दशेचे प्रतीक बनला आहे.

• मोठमोठे खड्डे – गाड्यांची मोडतोड

• साचलेले पाणी – अपघातांचा धोका

• अनेकांचा जीव गेला – तरीही इंचभर काम नाही

नेते मंडळी फक्त फोटोसेशन करून जातात. नारळ फुटतात पण समस्या जैसे थेच राहते. हा रस्ता म्हणजे जनतेचा अपमान आहे. दहा वर्षे लोकांच्या संयमाची थट्टा करण्यात आली आहे.

पोलिसांना बळीचा बकरा बनवले

या सर्व व्यवस्थापनाचा बोजा थेट वाहतूक पोलिसांवर टाकण्यात आला आहे.

• अपुरे मनुष्यबळ

• पावसात रेनकोट घालून रस्त्यावर उभे राहणे

• नागरिकांचा रोष, शिव्या सहन करणे

ग्राउंडवर फक्त पोलीस दिसतात, पण खरे जबाबदार – प्रशासन, हायवे अथॉरिटी आणि स्थानिक स्वराज्य संस्था – हे मात्र आरामात एसीच्या खोल्यांत बसून तमाशा पाहतात.

हे फक्त खड्डे नाहीत – ही भ्रष्टाचाराची स्मारके आहेत!

नागरिकांनी हे समजून घेतले पाहिजे की हे खड्डे, हे पाणी, ही वाहतूक कोंडी – हे सगळे अपघात केवळ पावसामुळे नाहीत. हे थेट भ्रष्टाचारामुळे, निष्काळजीपणामुळे आणि बेजबाबदार नेतृत्वामुळे आहे.

• जनतेच्या कराच्या पैशातून करोडो रुपये खर्च करून रस्ते केले जातात.

• दोन पावसात हे रस्ते वाहून जातात.

• ठेकेदार, अधिकारी आणि राजकारणी मात्र समाधानी.

हे फक्त प्रशासनाचे अपयश नाही, हा नागरिकांवरचा सरळसरळ अन्याय आहे.

आता नागरिकांनी उठायलाच हवे!

पुणे–पिंपरी चिंचवडमधील जनतेने आता मौन सोडले पाहिजे.

• फक्त सोशल मीडियावर पोस्ट करून थांबायचे नाही.

• प्रत्यक्ष रस्त्यावर उतरून जाब मागायलाच हवा.

• खड्ड्यांची मोजणी करून प्रशासनासमोर हिशेब मागावा.

• नेत्यांच्या फोटोंऐवजी त्यांच्या कामांची ‘पोलखोल’ करावी.

लोकशाहीत जनता हीच खरी ताकद आहे. जर जनता उठली, प्रश्न विचारले, रस्त्यावर उतरली – तरच प्रशासनाचे डोळे उघडतील. अन्यथा दरवर्षी पावसाळा आला की आपण पुन्हा याच खड्ड्यांमध्ये लोळत राहणार.

नागरिकांचा आवाज दाबता येणार नाही

आज या शहरातील प्रत्येक नागरिक विचारतो आहे –

• आमचे कर कुठे जात आहेत?

• आमचा जीव धोक्यात टाकण्याचा अधिकार तुम्हाला कोणी दिला?

• दहा वर्षांचा प्रश्न सोडवता आला नाही, तर तुमची खुर्ची कशासाठी?

ही वेळ आहे संताप कृतीत बदलण्याची. खड्डे बुजवणे, दर्जेदार रस्ते बनवणे, पाणी निचरा करणे – ही प्रशासनाची मूलभूत जबाबदारी आहे. त्यावरून पळवाट नाही.जर हे काम झाले नाही, तर जनतेने पुढाकार घेऊन हिशेब मागायलाच हवा. कारण आता ‘खड्डे बुजवा नाहीतर खुर्ची सोडा’ अशी घोषणा देण्याची वेळ आली आहे!