मुंबई : राष्ट्रवादी काँग्रेसचे नेते व माजी मंत्री माणिकराव कोकाटे यांच्या प्रकृतीबाबत महत्त्वाची माहिती समोर आली आहे. उच्च रक्तदाबाचा त्रास वाढल्याने कोकाटे यांना मुंबईतील लीलावती रुग्णालयात दाखल करण्यात आले असून, आज त्यांची अँजिओग्राफी करण्यात येणार आहे.नाशिकमधील सदनिका घोटाळा प्रकरणात दोषी ठरल्यानंतर कोकाटे यांना मंत्रिपदाचा राजीनामा द्यावा लागला होता. न्यायालयाच्या निर्णयानंतर त्यांचा रक्तदाब अचानक वाढल्याने त्यांना तातडीने रुग्णालयात हलवण्यात आले. सध्या त्यांच्यावर ICU मध्ये उपचार सुरू असून, प्रकृती स्थिर ठेवण्यासाठी डॉक्टरांकडून विशेष देखरेख करण्यात येत आहे.
डॉक्टरांच्या सल्ल्यानुसार अँजिओग्राफीचा निर्णय घेण्यात आला असून, अहवाल आल्यानंतर पुढील उपचार किंवा डिस्चार्जबाबत निर्णय घेतला जाणार आहे. रुग्णालयात कोकाटे यांची मुलगी सीमंतिनी कोकाटे आणि पत्नी सीमा कोकाटे उपस्थित आहेत.दरम्यान, कोकाटे यांच्याविरोधात नॉन-बेलेबल वॉरंट (NBW) बजावण्याच्या प्रक्रियेवरही चर्चा सुरू आहे. वैद्यकीय परिस्थिती लक्षात घेता हे वॉरंट रुग्णालयातच बजावले जाण्याची शक्यता आहे. यासाठी नाशिक पोलिसांची टीम लीलावती रुग्णालयात दाखल झाली आहे.
विजय कोकाटेंचा शोध सुरू
या प्रकरणात माणिकराव कोकाटे यांच्यासह त्यांचे बंधू विजय कोकाटे यांच्याविरोधातही अटक वॉरंट जारी करण्यात आले आहे. विजय कोकाटे सध्या फरार असून, त्यांच्या शोधासाठी नाशिक पोलिसांकडून शोधमोहीम सुरू असल्याची माहिती मिळत आहे.
