चंद्रपूर : चंद्रपूर शहरात डॉ. बाबासाहेब आंबेडकर जयंती उत्सवादरम्यान घडलेल्या धक्कादायक घटनेने खळबळ उडाली आहे. गांधी चौक परिसरात मध्यरात्री डीजेवर नाचताना झालेल्या किरकोळ वादाचे रूपांतर थेट हत्येत झाले. या घटनेत रविकांत टेंभूरकर (वय 36) यांचा मृत्यू झाला असून, त्यांना रुग्णालयात नेत असतानाच प्राण गमवावे लागले.
माहितीनुसार, डीजेवर नाचताना धक्का लागल्याच्या कारणावरून दोन गटांमध्ये वाद झाला. हा वाद चिघळत गेल्यानंतर पाच युवकांनी टेंभूरकर यांच्यावर हल्ला केला. या प्रकरणी पोलिसांनी एका अल्पवयीन आरोपीसह पाच जणांना अटक केली असून तपास सुरू आहे.ही मिरवणूक शहरातील इंदिरानगर भागातील एका मंडळाच्या वतीने काढण्यात आली होती. मात्र, उत्सवाच्या पार्श्वभूमीवर युवकांकडे शस्त्रे असल्याची बाब समोर आल्याने नागरिकांमध्ये चिंता व्यक्त होत आहे.
