पुणे :पुण्यातील कात्रज परिसरातील जांभुळवाडी येथे मंगळवारी दुपारी एक धक्कादायक आणि तणावपूर्ण प्रसंग घडला. खेळताना सात वर्षांचा मुलगा दोन भिंतींमधील अतिशय अरुंद जागेत अडकला. घटनेची माहिती मिळताच परिसरात घबराट पसरली.
माहिती मिळताच पीएमआरडीए, पुणे महापालिका, अग्निशमन दल आणि आपत्ती व्यवस्थापन पथक तातडीने घटनास्थळी दाखल झाले. जागा अतिशय अरुंद आणि धोकादायक असल्यामुळे बचावकार्य मोठे आव्हान ठरत होते.
जवानांनी संयम आणि कौशल्य दाखवत अत्याधुनिक उपकरणांच्या मदतीने भिंतीचा काही भाग काळजीपूर्वक तोडला. घन, बोल्ट कटर आणि हायड्रॉलिक ब्रेकरचा वापर करत त्यांनी अडकलेल्या मुलापर्यंत पोहोचण्याचा मार्ग तयार केला.
काही काळ सुरू असलेल्या प्रयत्नांनंतर अखेर मुलाची सुरक्षित सुटका करण्यात जवानांना यश आले. या वेळी उपस्थित नागरिकांनी सुटकेचा निश्वास टाकत बचाव पथकाच्या तत्परतेचे आणि धाडसाचे कौतुक केले.
सुदैवाने या घटनेत मुलाला कोणतीही गंभीर दुखापत झाली नाही. प्राथमिक तपासणीसाठी त्याला जवळच्या रुग्णालयात दाखल करण्यात आले आहे. या घटनेमुळे परिसरात काही काळ तणावाचे वातावरण निर्माण झाले होते, मात्र वेळेवर झालेल्या बचावकार्यातून मोठी दुर्घटना टळली.
