मुंबई : मुंबई पोलिसांच्या गुन्हे शाखेने गिरगाव परिसरातील एका नामांकित हॉटेलवर टाकलेल्या छाप्यात कथित हाय-प्रोफाईल सेक्स रॅकेटचा पर्दाफाश केला आहे. या कारवाईत दोन महिलांची सुटका करण्यात आली असून, त्यापैकी एक मराठी चित्रपटसृष्टीतील अभिनेत्री तर दुसरी बॉलिवूड आणि बंगाली मनोरंजन क्षेत्राशी संबंधित असल्याची माहिती समोर आली आहे. या प्रकरणात सिनेसृष्टीशी संबंधित एका महिला मेकअप आर्टिस्टला अटक करण्यात आली असून, ती अभिनेत्रींना अनैतिक व्यवसायासाठी ग्राहकांशी संपर्क करून देत असल्याचा आरोप आहे.
पोलिसांनी दिलेल्या माहितीनुसार, आरोपीने दोन अभिनेत्रींसाठी एका ग्राहकासोबत तब्बल दोन लाख रुपयांचा व्यवहार निश्चित केला होता. प्रति अभिनेत्री एका रात्रीसाठी एक लाख रुपये असा सौदा ठरवण्यात आल्याचे तपासात निष्पन्न झाले आहे. याच व्यवहाराच्या आधारे गुन्हे शाखेने सापळा रचून आरोपीला रंगेहाथ ताब्यात घेतले.
प्राथमिक चौकशीत सुटका करण्यात आलेल्या मराठी अभिनेत्रीने ग्रामीण भागातून अभिनय क्षेत्रात करिअर करण्याच्या उद्देशाने मुंबई गाठल्याचे समोर आले आहे. मात्र, कामाच्या अभावामुळे निर्माण झालेल्या आर्थिक अडचणींचा फायदा घेत आरोपीने तिला पैशांचे आमिष दाखवत या रॅकेटमध्ये ओढल्याचा संशय पोलिसांनी व्यक्त केला आहे.
या प्रकरणाचा तपास सुरू असून, या रॅकेटमागे आणखी कोणते दलाल, मनोरंजन क्षेत्रातील व्यक्ती किंवा इतर संबंधितांचा सहभाग आहे का, याचा शोध पोलीस घेत आहेत. तसेच संबंधित हॉटेल व्यवस्थापनाची भूमिका आणि आर्थिक व्यवहारांचीही चौकशी केली जात आहे.
दरम्यान, सुटका करण्यात आलेल्या दोन्ही महिलांची ओळख कायदेशीर कारणांमुळे मुंबई पोलिसांनी जाहीर केलेली नाही. तपास पूर्ण होईपर्यंत अधिकृत माहितीच्या आधारेच पुढील कारवाई करण्यात येणार असल्याचे पोलिसांनी स्पष्ट केले आहे.
