पुणे : पुणे शहरात अवैध धंद्यांविरोधातील कारवाईला वेग देत काळेपडळ पोलिसांनी पिंपळे सौदागर परिसरातील एका हॉटेलमध्ये सुरू असलेल्या बोगस हुक्का पार्लरवर धडक कारवाई केली. या कारवाईत एकूण ५७ लाख ८० हजार ३७१ रुपयांचा मुद्देमाल जप्त करण्यात आला असून १० जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, पिंपळे सौदागर येथील एका फार्म हाऊसच्या मागील बाजूस असलेल्या हॉटेलमध्ये बेकायदेशीररीत्या फ्लेवर्ड हुक्क्यांची विक्री सुरू असल्याची गोपनीय माहिती पोलिस अंमलदार महेश शिंदे व अतुल पंढरकर यांना मिळाली होती. त्यानुसार सापळा रचून छापा टाकण्यात आला.
कारवाईदरम्यान घटनास्थळावरून ३ चारचाकी, २ दुचाकी, १२ मोबाईल फोन, ८ हुक्का पॉट, तंबाखूयुक्त हुक्का फ्लेवर्स तसेच इतर साहित्य असा एकूण ५७,८०,३७१ रुपयांचा मुद्देमाल जप्त करण्यात आला.
या प्रकरणी काळेपडळ पोलीस ठाण्यात सिगारेट व इतर तंबाखूजन्य उत्पादने (जाहिरात प्रतिबंध व व्यापार, उत्पादन, पुरवठा आणि वितरण नियंत्रण) अधिनियम, २००३ अंतर्गत गुन्हा दाखल करण्यात आला असून पुढील तपास पोलीस निरीक्षक अनिल शेळके यांच्या मार्गदर्शनाखाली सुरू आहे.ही कारवाई पोलीस उपायुक्त, सहायक पोलीस आयुक्त, वरिष्ठ पोलीस निरीक्षक यांच्या मार्गदर्शनाखाली काळेपडळ पोलीस ठाण्याच्या पथकाने यशस्वीरीत्या पार पाडली.
