पुणे : पुणे शहरातील नवले पूल परिसरात सुरू असलेल्या कथित देहव्यापारावर गुन्हे शाखेच्या अनैतिक मानवी वाहतूक व व्यापार प्रतिबंध कक्षाने मोठी कारवाई केली आहे. बनावट ग्राहकाच्या माध्यमातून माहितीची खातरजमा केल्यानंतर पोलिसांनी दोन लॉजवर छापा टाकत देहव्यापारासाठी आणलेल्या ९ महिलांची सुटका केली. या प्रकरणी दोघांना अटक करण्यात आली असून आणखी एका आरोपीविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आंबेगाव बुद्रुक येथील साई किरण लॉज आणि गॅलेक्सी लॉजमध्ये महिलांकडून देहव्यापार सुरू असल्याची गोपनीय माहिती गुन्हे शाखेला मिळाली होती. त्यानंतर पोलिसांनी बनावट ग्राहक पाठवून माहितीची खातरजमा केली. खात्री पटताच दोन्ही लॉजवर धाड टाकण्यात आली.
या कारवाईत देहव्यापारासाठी आणलेल्या ९ पीडित महिलांची सुटका करण्यात आली. तसेच राकेश राजू पाटोळे (२७, धायरी) आणि लॉज व्यवस्थापक मंगेश व्यंकट बनसोडे यांना अटक करण्यात आली. या प्रकरणी आणखी एका संशयिताविरोधात आंबेगाव पोलीस ठाण्यात गुन्हा दाखल करण्यात आला असून पुढील तपास सुरू आहे.
ही कारवाई अनैतिक मानवी वाहतूक व व्यापार प्रतिबंध कक्षाचे वरिष्ठ पोलीस अधिकारी गौहर हसन यांच्या मार्गदर्शनाखाली पोलीस निरीक्षक आशालता खापरे, सहाय्यक पोलीस निरीक्षक विक्रम मिसाळ आणि त्यांच्या पथकाने केली. पोलिसांच्या या कारवाईमुळे नवले पूल परिसरातील बेकायदेशीर देहव्यापाराच्या रॅकेटवर मोठा आघात झाल्याचे मानले जात आहे.
