पुणे : पुणे शहर आणि जिल्ह्यात गेल्या दोन दिवसांत पावसाचा जोर कमी झाला असला, तरी पुढील दोन दिवस हलक्या ते मध्यम स्वरूपाच्या पावसाची शक्यता भारतीय हवामान विभागाने व्यक्त केली आहे. या कालावधीत शहरात ढगाळ वातावरण कायम राहणार असून नागरिकांनी हवामानातील बदल लक्षात घेऊन आवश्यक खबरदारी घेण्याचे आवाहन करण्यात आले आहे.
रविवारी (२६ जुलै) सकाळी शहरातील विविध भागांमध्ये हलक्या पावसाच्या सरी कोसळल्या. मात्र दुपारनंतर पावसाने विश्रांती घेतल्याने हवेत दमटपणा जाणवला. अधूनमधून ऊन पडत असल्याने दिवसभर ऊन-पावसाचा लपंडाव अनुभवायला मिळाला.
हवामान विभागाच्या नोंदीनुसार, रविवारी पाषाण परिसरात सर्वाधिक ५ मिलिमीटर पावसाची नोंद झाली. तर शिवाजीनगर, एनडीए, लोहगाव आणि कोरेगाव पार्क येथे २ ते ४ मिलिमीटरपर्यंत पाऊस झाला.
गेल्या आठवड्यातील मुसळधार पावसानंतर आता पावसाची तीव्रता कमी झाल्याचे चित्र दिसत आहे. पुढील दोन दिवस हलक्या सरींचा अंदाज असून त्यानंतरही शहरात प्रामुख्याने ढगाळ वातावरण राहण्याची शक्यता आहे. दरम्यान, कमाल तापमानात किंचित वाढ होऊ शकते, तर घाटमाथा परिसरात हलका ते मध्यम पाऊस कायम राहण्याचा अंदाज हवामान विभागाने वर्तवला आहे.
