पुणे : शहरात ६० वर्षांवरील व्यक्तीचे घरी निधन झाल्यानंतर अंत्यविधीसाठी आवश्यक असलेला 'मयत पास' पूर्वीप्रमाणे नगरसेवकांच्या शिफारसपत्रावर देण्यात यावा, अशी मागणी नगरसेवक राजाभाऊ लायगुडे यांनी पुणे महानगरपालिकेकडे केली आहे.
लायगुडे यांनी दिलेल्या निवेदनात म्हटले आहे की, शहरासह उपनगरांमध्ये वृद्ध व्यक्तीचे घरी निधन झाल्यास मयत पास मिळविण्यासाठी नातेवाईकांना अनेक अडचणींचा सामना करावा लागतो. ओळखीचे डॉक्टर उपलब्ध नसल्यास रुग्णालये व दवाखान्यांमध्ये वारंवार फेऱ्या माराव्या लागतात.
तसेच, काही डॉक्टरांकडून आवश्यक कागदपत्रांसाठी तीन ते पाच हजार रुपयांपर्यंत शुल्क मागितले जात असल्याच्या तक्रारी नागरिकांकडून होत आहेत. त्यामुळे दुःखाच्या प्रसंगी संबंधित कुटुंबाची आर्थिक तसेच मानसिक पिळवणूक होत असल्याचे लायगुडे यांनी नमूद केले आहे.
या पार्श्वभूमीवर, नागरिकांची गैरसोय टाळण्यासाठी आणि अंत्यविधीची प्रक्रिया सुलभ करण्यासाठी मयत पास पूर्वीप्रमाणे नगरसेवकांच्या शिफारसपत्रावरच देण्याची व्यवस्था पुन्हा सुरू करावी, अशी मागणी त्यांनी पुणे महानगरपालिकेकडे केली आहे.
