पुणे : भारतीय विद्या भवन आणि इन्फोसिस फाऊंडेशन यांच्या संयुक्त विद्यमाने सांस्कृतिक प्रसार कार्यक्रमांतर्गत ‘लक्ष्य’ या नृत्य कार्यक्रमाचे आयोजन शनिवार, दि. २२ ऑगस्ट २०२६ रोजी सायंकाळी ६ वाजता भारतीय विद्या भवन, सरदार नातू सभागृह, सेनापती बापट रस्ता, पुणे येथे करण्यात आले आहे. हा कार्यक्रम शास्त्रीय नृत्य संवर्धन संस्था (एसएनएसएस) यांच्या वतीने प्रस्तुत करण्यात येत आहे.‘लक्ष्य’ या कार्यक्रमात भारतातील तीन विविध शास्त्रीय नृत्यशैलींची स्वतंत्र सादरीकरणे रसिकांना अनुभवता येणार आहेत.
मणिपुरी नृत्यशैलीचे सादरीकरण मुंबईच्या प्रख्यात नृत्यगुरू आणि नामवंत कलावंत गुरू लतासना देवी करणार आहेत. बंगळुरू येथील शिवरंजनी हरीश भरतनाट्यमचे सादरीकरण करणार असून, पुण्याच्या पूजयिता भट्टाचार्य ओडिसी नृत्य सादर करणार आहेत.भारतीय शास्त्रीय नृत्यपरंपरेतील विविधता, सौंदर्य आणि अभिव्यक्तीचे दर्शन घडविणारा ‘लक्ष्य’ हा कार्यक्रम पुण्यातील नृत्यरसिकांसाठी विशेष पर्वणी ठरणार आहे. तीन वेगवेगळ्या शास्त्रीय नृत्यशैलींचे स्वतंत्र एकल सादरीकरण एकाच व्यासपीठावर अनुभवण्याची संधी या कार्यक्रमातून मिळणार आहे.भारतीय विद्या भवन आणि इन्फोसिस फाऊंडेशन यांच्या संयुक्त विद्यमाने सांस्कृतिक प्रसार कार्यक्रमांतर्गत आयोजित हा ३०१ वा कार्यक्रम असून, सर्वांना प्रवेश विनामूल्य असल्याची माहिती भारतीय विद्या भवनचे संचालक प्रा. नंदकुमार काकिर्डे यांनी दिली.
