धाराशिव : धाराशिव जिल्ह्यातील नळदुर्ग किल्ल्यावर घडलेल्या एका हृदयद्रावक घटनेने संपूर्ण महाराष्ट्र हादरला आहे. राष्ट्रीय स्तरावर कुस्तीमध्ये उल्लेखनीय कामगिरी करणाऱ्या महिला कुस्तीपटू अश्विनी मनोहर पौळ यांनी आपल्या तीन लहान मुलांसह टोकाचे पाऊल उचलल्याची धक्कादायक घटना समोर आली आहे. या घटनेत अश्विनी पौळ आणि त्यांचा साडेपाच वर्षांचा मुलगा अजिंक्य यांचा मृत्यू झाला. त्यांच्या अडीच वर्षांच्या जुळ्या मुलींनाही गंभीर दुखापत झाली. त्यापैकी क्रांती या चिमुकलीचा उपचारादरम्यान मृत्यू झाल्याचे वृत्त आहे, तर वीरा या मुलीवर धाराशिव येथील शासकीय रुग्णालयात उपचार सुरू आहेत. तिची प्रकृती गंभीर असल्याचे सांगण्यात येत आहे.

ही घटना ३ सप्टेंबर रोजी नळदुर्ग किल्ल्यातील उंच भाग असलेल्या उपळी बुरुजाजवळ घडली. अश्विनी या आपल्या तीन मुलांसह किल्ला पाहण्यासाठी आल्या होत्या. दुपारच्या सुमारास ही घटना घडल्याची प्राथमिक माहिती आहे. घटनेची माहिती मिळताच किल्ला प्रशासन आणि पोलिसांना कळवण्यात आले. त्यानंतर नळदुर्ग पोलिसांचे पथक घटनास्थळी दाखल झाले आणि जखमी मुलींना तातडीने रुग्णालयात हलवण्यात आले.

‘महाराष्ट्राची वाघीण’ म्हणून होती ओळख

अश्विनी पौळ या केवळ एक सामान्य महिला नव्हत्या, तर त्यांनी कुस्तीच्या मैदानावर आपल्या जिद्दीची आणि मेहनतीची छाप उमटवली होती. राष्ट्रीय स्तरावरील महिला कुस्तीपटू म्हणून त्यांनी अनेक स्पर्धांमध्ये सहभाग घेत उल्लेखनीय यश मिळवले होते. त्यांच्या दमदार कामगिरीमुळे कुस्ती क्षेत्रात त्यांना ‘महाराष्ट्राची वाघीण’ म्हणून ओळख मिळाली होती.त्यांच्या निधनाची बातमी समोर आल्यानंतर क्रीडा क्षेत्रातूनही हळहळ व्यक्त होत आहे. एका यशस्वी खेळाडूचा अशा पद्धतीने अंत झाल्याने त्यांच्या कुटुंबीयांसह चाहत्यांनाही मोठा धक्का बसला आहे.

घरातूनच मिळाले कुस्तीचे बाळकडू

अश्विनी यांचे संपूर्ण कुटुंब कुस्तीशी जोडलेले असल्याचे समोर आले आहे. त्यांचे वडील, भाऊ, आई आणि बहीण यांनाही कुस्तीची आवड होती. त्यामुळे लहानपणापासूनच अश्विनी यांना कुस्तीचे वातावरण मिळाले.वडिलांना कुस्तीची विशेष आवड असल्याने त्यांनी मुलीच्या सरावासाठी घरातच तालीम उभी केली होती. याच तालमीत मेहनत घेत अश्विनी यांनी आपल्या कुस्तीच्या कारकिर्दीला सुरुवात केली आणि पुढे राष्ट्रीय स्तरावर आपले नाव निर्माण केले.

राष्ट्रीय स्पर्धांमध्ये मिळवली अनेक पदके

अश्विनी यांनी राष्ट्रीय स्तरावरील विविध कुस्ती स्पर्धांमध्ये उल्लेखनीय कामगिरी केली होती. २००७ मध्ये तिरुवनंतपुरम येथे झालेल्या राष्ट्रीय कुस्ती स्पर्धेत त्यांनी प्रथम क्रमांक मिळवला. त्यानंतर २००८ मध्ये गुरुदासपूर आणि २००९ मध्ये चेन्नई येथे झालेल्या राष्ट्रीय स्पर्धांमध्येही त्यांनी सुवर्णपदक पटकावले.यानंतरही त्यांनी विविध राष्ट्रीय स्पर्धांमध्ये आपली कामगिरी कायम ठेवली. त्यांच्या संपूर्ण कारकिर्दीत ५ सुवर्ण आणि ६ रौप्य पदकांची कमाई केल्याचे वृत्त आहे. त्यामुळे महाराष्ट्राच्या क्रीडा क्षेत्रात त्यांचे नाव आदराने घेतले जात होते.

कुटुंबावर अचानक कोसळले दुःखाचे डोंगर

अश्विनी पौळ यांच्या तीन लहान मुलांनाही या घटनेचा मोठा फटका बसला. अजिंक्य या साडेपाच वर्षांच्या मुलाचा मृत्यू झाला, तर अडीच वर्षांच्या जुळ्या मुलींपैकी क्रांती हिचाही उपचारादरम्यान मृत्यू झाला. वीरा ही मुलगी गंभीर जखमी असून तिच्यावर रुग्णालयात उपचार सुरू आहेत.या घटनेमुळे अश्विनी यांच्या कुटुंबावर दुःखाचा डोंगर कोसळला आहे. परिसरातही या घटनेची मोठी चर्चा असून नागरिकांकडून हळहळ व्यक्त केली जात आहे.

घटनेमागचे नेमके कारण काय?

दरम्यान, अश्विनी यांनी एवढे टोकाचे पाऊल का उचलले, हा सर्वात मोठा प्रश्न उपस्थित झाला आहे. या घटनेमागील नेमके कारण अद्याप अधिकृतपणे स्पष्ट झालेले नाही. नळदुर्ग पोलिसांकडून या प्रकरणाचा तपास सुरू आहे.अश्विनी यांच्या वडिलांनी त्यांच्या पती आणि सासरच्या मंडळींकडून मानसिक व शारीरिक त्रास दिला जात असल्याचा गंभीर आरोप केला आहे. मात्र हे आरोप तपासाचा भाग असून, त्याबाबत पोलिसांकडून अधिकृत निष्कर्ष अद्याप समोर आलेला नाही.

काही महिन्यांपूर्वी नोकरी सोडली होती

अश्विनी या मुंबई येथे एमएसएफमध्ये नोकरी करत असल्याची माहिती समोर आली आहे. काही महिन्यांपूर्वी त्यांनी नोकरीचा राजीनामा दिला होता. त्यानंतर त्या आपल्या तीन मुलांसह माहेरी राहत असल्याचे वृत्त आहे. त्यांच्या वैयक्तिक आयुष्यातील परिस्थिती, कौटुंबिक संबंध आणि नोकरी सोडण्यामागील कारण यासह विविध बाबींचा तपास केला जात आहे.

नळदुर्ग किल्ल्यातील सुरक्षेचा प्रश्नही ऐरणीवर

या घटनेनंतर ऐतिहासिक नळदुर्ग किल्ल्यात पर्यटकांच्या सुरक्षेचा मुद्दाही चर्चेत आला आहे. उपळी बुरुजासारख्या उंच आणि धोकादायक ठिकाणी पर्यटकांच्या सुरक्षेसाठी पुरेशा उपाययोजना आहेत का, असा प्रश्न उपस्थित केला जात आहे. नळदुर्ग किल्ला हा ऐतिहासिकदृष्ट्या महत्त्वाचा किल्ला असून त्याची भव्य तटबंदी आणि विविध बुरुज हे प्रमुख वैशिष्ट्ये आहेत.दरम्यान, अश्विनी पौळ यांच्या मृत्यूमागील नेमके कारण, कौटुंबिक परिस्थिती आणि या संपूर्ण घटनेची पार्श्वभूमी पोलिस तपासातून समोर येणार आहे. राष्ट्रीय स्तरावर महाराष्ट्राचे नाव उज्ज्वल करणाऱ्या एका महिला कुस्तीपटूचा आणि तिच्या चिमुकल्या मुलांचा झालेला हा दुर्दैवी अंत क्रीडा क्षेत्रासह संपूर्ण महाराष्ट्रासाठी अत्यंत वेदनादायी ठरला आहे.