पुणे : सोशल मीडियावर सध्या १९८०च्या दशकाची भुरळ पुन्हा पाहायला मिळत आहे. AIच्या मदतीने सध्याचे फोटो ८०च्या दशकातील रेट्रो अंदाजात तयार करण्याचा ट्रेंड इन्स्टाग्रामवर मोठ्या प्रमाणात व्हायरल झाला आहे. जुन्या काळातील फॅशन, स्टाईल आणि वातावरणाची आठवण करून देणारे हे फोटो नेटकऱ्यांचे लक्ष वेधून घेत आहेत.

रंगीबेरंगी शर्ट, वेगळ्या पद्धतीच्या हेअरस्टाईल, जुन्या काळातील पोझ, गॉगल्स आणि जुन्या इमारतींची पार्श्वभूमी अशा विविध गोष्टींचा वापर करून AIच्या माध्यमातून फोटो तयार केले जात आहेत. सध्याच्या छायाचित्राला जुन्या कॅमेऱ्याने टिपलेल्या फोटोसारखा लूक देण्यात येत असल्याने अनेकांना या ट्रेंडच्या माध्यमातून जुन्या काळाची अनुभूती मिळत आहे.

विशेष म्हणजे, हा ट्रेंड केवळ तरुणाईपुरता मर्यादित राहिलेला नाही. सर्वसामान्य सोशल मीडिया यूजर्सपासून सेलिब्रिटी आणि राजकीय नेत्यांपर्यंत अनेक जण आपले रेट्रो फोटो सोशल मीडिया प्लॅटफॉर्मवर शेअर करत आहेत. काही फोटोमध्ये ८०च्या दशकातील भारतीय फॅशन, तर काहींमध्ये जुन्या चित्रपटांच्या पोस्टर किंवा कौटुंबिक अल्बमसारखा लूक देण्यात येत आहे.

AIच्या मदतीने फोटो तयार करणे सोपे झाल्याने या ट्रेंडचा वेगाने प्रसार होत आहे. एखादा फोटो अपलोड करून त्यामध्ये कोणत्या प्रकारची हेअरस्टाईल, कपडे, पार्श्वभूमी, प्रकाशयोजना आणि जुन्या काळातील फोटो इफेक्ट हवा आहे, याबाबत सूचना दिल्यानंतर AI त्या पद्धतीने छायाचित्र तयार करत आहे. त्यामुळे व्यावसायिक फोटो एडिटिंगचे ज्ञान नसतानाही अनेकांना हा ट्रेंड सहज अनुभवता येत आहे.

या रेट्रो फोटोंना सोशल मीडियावरही मोठा प्रतिसाद मिळत आहे. अनेक जण आपले फोटो मित्र-परिवारासोबत शेअर करत असून, पोस्टवर मजेशीर कमेंट्स आणि कौतुकाच्या प्रतिक्रिया पाहायला मिळत आहेत. त्यामुळे काही दिवसांतच ८०च्या दशकातील स्टाईल सोशल मीडिया फीडवर पुन्हा दिसू लागली आहे.

या ट्रेंडची भुरळ राजकीय नेत्यांनाही पडली आहे. देशातील अनेक राजकीय नेत्यांचे ८०च्या दशकातील AI रेट्रो लूकमधील फोटो सोशल मीडियावर चर्चेत आले आहेत. केंद्रीय राज्यमंत्री मुरलीधर मोहोळ यांनीही या ट्रेंडमधील रेट्रो लूकचे छायाचित्र इन्स्टाग्रामवर शेअर केले आहे. त्यामुळे पुण्यासह सोशल मीडिया वर्तुळात त्यांच्या या फोटोचीही चर्चा होत आहे.

एकूणच, आधुनिक AI तंत्रज्ञानाच्या मदतीने जुन्या काळातील फॅशन आणि आठवणी नव्या स्वरूपात सोशल मीडियावर परत आल्या आहेत. ‘जुना काळ, नवा अंदाज’ अशी अनुभूती देणाऱ्या या ट्रेंडने सध्या नेटकऱ्यांना चांगलेच भुरळ घातली असून, ८०च्या दशकाची ही डिजिटल सफर सोशल मीडियावर चांगलीच रंगली आहे.