मुंबई : उपमुख्यमंत्री एकनाथ शिंदे यांच्या लंडन दौऱ्यानंतर मुंबईत परतल्यानंतर त्यांच्या मोबाईल फोनबाबत एक घटना चर्चेत आली आहे. ब्रिटिश एअरवेजच्या विमानाने मुंबईत दाखल झाल्यानंतर घरी पोहोचल्यावर मोबाईल जवळ नसल्याचे त्यांच्या लक्षात आल्याचे वृत्त समोर आले. त्यानंतर मोबाईलचा शोध घेण्यासाठी संबंधित यंत्रणांची धावपळ सुरू झाल्याचे सांगण्यात येत आहे.

लंडनहून मुंबईपर्यंतचा सुमारे नऊ तासांचा प्रवास केल्यानंतर शिंदे यांचे विमान पहाटे दोनच्या सुमारास छत्रपती शिवाजी महाराज आंतरराष्ट्रीय विमानतळावर दाखल झाले. विमानतळावर स्वागतासाठी आमदार आणि कार्यकर्ते उपस्थित होते. त्यानंतर शिंदे घरी रवाना झाले.

घरी पोहोचल्यानंतर पहाटे तीनच्या सुमारास मोबाईल जवळ नसल्याचे त्यांच्या लक्षात आल्याचे वृत्त आहे. त्यानंतर सुरक्षाव्यवस्थेला माहिती देण्यात आली. पोलिसांनी विमानतळावरील ब्रिटिश एअरवेजच्या सुरक्षा कार्यालयाशी संपर्क साधून विमानात मोबाईल राहिला आहे का, याचा शोध घेतल्याचे सांगितले जाते.माध्यमांमधील वृत्तानुसार, शोध घेतल्यानंतर मोबाईल सापडला आणि पहाटे चारच्या सुमारास तो परत मिळाल्याचे सांगण्यात आले. मात्र, या संपूर्ण प्रकरणाबाबत एकनाथ शिंदे यांच्या कार्यालयाकडून वेगळे स्पष्टीकरण देण्यात आले आहे. मोबाईल गहाळ झाल्याची अशी कोणतीही घटना घडली नसल्याचे त्यांच्या कार्यालयाकडून स्पष्ट करण्यात आल्याचे वृत्त आहे.

लंडन दौऱ्यात विविध कार्यक्रमांना उपस्थिती

एकनाथ शिंदे सप्टेंबरच्या सुरुवातीला लंडन दौऱ्यावर गेले होते. या दौऱ्यात ब्रिटिश संसदेतील हाऊस ऑफ लॉर्ड्स आणि हाऊस ऑफ कॉमन्समध्ये आयोजित कार्यक्रमांना त्यांनी उपस्थिती लावली. महाराष्ट्र मंडळाच्या वतीनेही त्यांचा सन्मान करण्यात आल्याचे सांगण्यात आले.

लंडन दौऱ्यादरम्यान शिंदे यांच्या विविध कार्यक्रमांची आणि त्यांच्या भाषणाची चर्चा झाली. तसेच सहकाऱ्यांसोबत लंडनमध्ये वडापावचा आस्वाद घेतानाचे क्षणही चर्चेत आले होते.दौरा पूर्ण करून मुंबईत परतल्यानंतर मोबाईल विमानात राहिल्याच्या कथित प्रकारामुळे पुन्हा एकदा शिंदे चर्चेत आले. मात्र, या प्रकरणाबाबत माध्यमांमध्ये आलेल्या वृत्तांवर त्यांच्या कार्यालयाने केलेले स्पष्टीकरण महत्त्वाचे ठरत आहे