रायगड-अलिबाग : राज्यभरात राबवल्या जाणाऱ्या ‘चला शाळेत जाऊ या’ या नावीन्यपूर्ण उपक्रमांतर्गत राज्याचे शालेय शिक्षण मंत्री दादाजी भुसे यांनी अलिबाग तालुक्यातील विविध जिल्हा परिषद शाळांना प्रत्यक्ष भेट देऊन तेथील शैक्षणिक वातावरणाचा आढावा घेतला.“अलिबागमधील जिल्हा परिषद शाळांनी शैक्षणिक, सांस्कृतिक आणि गुणवत्तावाढीच्या क्षेत्रात मिळवलेले यश, विद्यार्थ्यांमधील गुणवत्ता आणि शाळांची उत्तुंग प्रगती प्रत्यक्ष अनुभवणे हे माझे भाग्यच आहे,” अशा शब्दांत शालेय शिक्षणमंत्र्यांनी या शाळांचा गौरव केला. शिक्षणाविषयीची आपुलकी आणि विद्यार्थ्यांचा उत्साह वाढवण्यासाठी शिक्षणमंत्र्यांनी अलिबागमधील जिल्हा परिषद शाळा मुशेत, किहीम आदिवासी वाडी, रायगड जिल्हा परिषद उच्च प्राथमिक शाळा झिराड, बाबासाहेब नाजरे हायस्कूल आवास आणि जिल्हा परिषद शाळा नवगाव या शाळांची पाहणी केली.
या दौऱ्यादरम्यान पालकमंत्री भरतशेठ गोगावले, आमदार महेंद्र दळवी, जिल्हा परिषद अध्यक्ष मंगेश वाकडीकर, शिक्षण सभापती चंद्रकांत कळंबे, महिला बाल कल्याण सभापती रसिका केणी आणि मुख्य कार्यकारी अधिकारी नेहा भोसले यांची विशेष उपस्थिती होती. शाळा भेटीच्या वेळी विद्यार्थ्यांनी पारंपरिक लेझिम आणि ढोल पथकाच्या गजरात शालेय शिक्षणमंत्र्यांचे अतिशय उत्साहात स्वागत केले. औपचारिक पाहणीच्या पलीकडे जाऊन मंत्री महोदयांनी थेट वर्गात प्रवेश करत विद्यार्थ्यांशी आपुलकीचा संवाद साधला. त्यांनी मुलांकडून प्रत्यक्ष वाचन करून घेतले आणि त्यांच्या शैक्षणिक प्रगतीचा आढावा घेतला. या खास प्रसंगी शिक्षणमंत्र्यांच्या हस्ते विद्यार्थ्यांना प्रेरणादायी पुस्तके भेट देऊन त्यांचा विशेष गौरव करण्यात आला.
झिराड येथील जिल्हा परिषद शाळेच्या विज्ञान प्रयोगशाळेला भेट देऊन शिक्षणमंत्र्यांनी तेथील विद्यार्थ्यांकडून प्रयोगांची सविस्तर माहिती जाणून घेतली. तसेच विद्यार्थ्यांनी साकारलेल्या कला व कार्यानुभव प्रदर्शनाची त्यांनी अत्यंत बारकाईने पाहणी केली आणि बालवैज्ञानिकांच्या कल्पकतेला व कौशल्याला मनापासून दाद दिली.जिल्हा परिषदेच्या शाळांमध्ये राबवले जात असलेले विविध नावीन्यपूर्ण उपक्रम, गुणवत्तेवर दिला जाणारा भर आणि विद्यार्थ्यांचा सर्वांगीण विकास पाहून उपस्थित मान्यवरांनी समाधान व्यक्त केले.या दौऱ्यामुळे अलिबागमधील शाळांमधील शिक्षक, विद्यार्थी आणि पालकांमध्ये मोठा उत्साह पाहावयास मिळाला.
