मुंबई : मुंबईतील लोकल प्रवाशांसाठी महत्त्वाची बातमी आहे. रेल्वे रुळांची देखभाल, दुरुस्ती आणि सिग्नल यंत्रणेतील तांत्रिक कामांसाठी रविवारी, २५ ऑक्टोबर रोजी मध्य रेल्वेच्या मुख्य मार्गावर आणि हार्बर मार्गावर मेगाब्लॉक घेण्यात येणार आहे. याशिवाय, पश्चिम रेल्वेवर शनिवारी मध्यरात्रीपासून रविवारी पहाटेपर्यंत जलद मार्गावर विशेष ब्लॉक असेल. त्यामुळे काही लोकलच्या मार्गात बदल करण्यात येणार असून, हार्बर मार्गावरील अनेक फेऱ्या रद्द राहणार आहेत. प्रवाशांनी घराबाहेर पडताना रेल्वेचे वेळापत्रक तपासून प्रवासाचे नियोजन करावे.

मध्य रेल्वेवर माटुंगा ते मुलुंडदरम्यान ब्लॉक

मध्य रेल्वेच्या माटुंगा ते मुलुंड स्थानकांदरम्यान अप आणि डाऊन जलद मार्गावर रविवारी सकाळी ११.०५ ते दुपारी ३.४५ या वेळेत मेगाब्लॉक घेतला जाणार आहे.या कालावधीत छत्रपती शिवाजी महाराज टर्मिनस येथून सुटणाऱ्या डाऊन जलद लोकल माटुंगा ते मुलुंडदरम्यान धीम्या मार्गावरून चालवण्यात येतील. या गाड्यांना संबंधित स्थानकांवर थांबे देण्यात येतील. मुलुंड येथे या लोकल पुन्हा जलद मार्गावर वळवण्यात येतील.

दुसरीकडे, ठाण्याहून सीएसएमटीच्या दिशेने जाणाऱ्या अप जलद लोकल मुलुंड ते माटुंगा या दरम्यान अप धीम्या मार्गावरून धावतील. त्यामुळे या मार्गावरील प्रवाशांना प्रवासासाठी नेहमीपेक्षा अधिक वेळ लागू शकतो.

हार्बर मार्गावरील लोकल फेऱ्या रद्द

हार्बर मार्गावर कुर्ला ते वाशी दरम्यान अप आणि डाऊन मार्गावर रविवारी सकाळी ११.१० ते दुपारी ४.१० या वेळेत ब्लॉक असेल.या काळात सीएसएमटीहून पनवेल, बेलापूर आणि वाशीकडे जाणाऱ्या डाऊन लोकल सेवा बंद राहतील. तसेच पनवेल, बेलापूर आणि वाशी येथून सीएसएमटीच्या दिशेने येणाऱ्या अप लोकलच्या फेऱ्याही रद्द करण्यात येतील.

हार्बर मार्गावरून प्रवास करणाऱ्या प्रवाशांनी पर्यायी रेल्वे सेवा आणि उपलब्ध प्रवासाच्या पर्यायांची माहिती घेऊनच प्रवास करावा.

पश्चिम रेल्वेवर रात्रीचा ब्लॉक

पश्चिम रेल्वेच्या सांताक्रूझ ते गोरेगाव स्थानकांदरम्यान अप आणि डाऊन जलद मार्गावर शनिवारी, २४ ऑक्टोबर रोजी मध्यरात्री १२.३० ते रविवारी पहाटे ४.३० वाजेपर्यंत ब्लॉक घेण्यात येणार आहे.ब्लॉकच्या कालावधीत या विभागातून धावणाऱ्या जलद लोकल धीम्या मार्गावर वळवण्यात येतील. तसेच काही लोकल फेऱ्या रद्द करण्यात येणार आहेत. मात्र, पश्चिम रेल्वेवर रविवारी दिवसा कोणताही ब्लॉक नियोजित नसल्याची माहिती आहे.

विक्रोळी-घाटकोपरदरम्यानच्या घटनेमुळे लोकल विस्कळीत

दरम्यान, शुक्रवारी सकाळी विक्रोळी आणि घाटकोपर स्थानकांदरम्यान पाचव्या आणि सहाव्या मार्गिकांच्या मधोमध सुमारे ३० वर्षांचा एक तरुण डोक्याला दुखापत झालेल्या अवस्थेत आढळला. या घटनेमुळे अप धीमी लोकल सुमारे १४ मिनिटे थांबवावी लागली.

सकाळच्या गर्दीच्या वेळी घडलेल्या या प्रकाराचा परिणाम मागून येणाऱ्या लोकल गाड्यांवरही झाला. परिणामी, मध्य रेल्वेवरील अनेक लोकल २० ते ३० मिनिटे उशिराने धावत होत्या. त्यामुळे प्रवाशांना मोठा मनस्ताप सहन करावा लागला. काही संतप्त प्रवाशांनी दादर स्थानकातील स्थानक व्यवस्थापक कार्यालयात जाऊन नाराजी व्यक्त केली.

प्राथमिक माहितीनुसार, जखमी अवस्थेत आढळलेला तरुण नशेत असल्याचे समोर आले. संबंधित लोकलच्या ट्रेन मॅनेजरने त्याला मदत करून घाटकोपर स्थानकातील उपस्थानक व्यवस्थापकांकडे सुपूर्द केले. त्यानंतर रेल्वे पोलिसांनी त्याला पुढील उपचारांसाठी राजावाडी रुग्णालयात दाखल केले.

प्रवाशांनी काय काळजी घ्यावी?

रविवारी मध्य रेल्वेच्या मुख्य मार्गावर आणि हार्बर मार्गावर होणाऱ्या ब्लॉकमुळे लोकलच्या वेळापत्रकात बदल होण्याची शक्यता आहे. त्यामुळे प्रवाशांनी प्रवास सुरू करण्यापूर्वी रेल्वे प्रशासनाच्या अधिकृत सूचनांची खात्री करावी आणि आवश्यकतेनुसार पर्यायी प्रवासाचे नियोजन करावे.

महत्त्वाचे : ब्लॉकच्या कालावधीत लोकलच्या फेऱ्या, थांबे आणि मार्गात बदल होणार असल्याने विशेषतः हार्बर मार्गावरील प्रवाशांनी प्रवासापूर्वी अद्ययावत माहिती तपासणे आवश्यक आहे.