पुणे : छत्रपती शिवाजी महाराजांचे व्यक्तिमत्त्व, विचार, निर्णयक्षमता, दूरदृष्टी आणि त्यांच्या असामान्य नेतृत्वगुणांचा मानसशास्त्रीय दृष्टिकोनातून अभ्यास करणाऱ्या ‘छत्रपती शिवाजी महाराजांचे मानसशास्त्र’ या ग्रंथाचे प्रकाशन पुण्यातील बालेवाडी येथे उत्साहपूर्ण वातावरणात संपन्न झाले. महाराष्ट्राचे मुख्यमंत्री देवेंद्र फडणवीस यांच्या शुभहस्ते या ग्रंथाचे प्रकाशन करण्यात आले.
पत्रकार जयंतराव जाधव यांनी गेल्या दोन वर्षांपासून केलेल्या अथक परिश्रम, सखोल संशोधन, अभ्यास आणि चिंतनातून हा ग्रंथ साकारला आहे. छत्रपती शिवाजी महाराजांच्या जीवनकार्याचा केवळ ऐतिहासिक दृष्टिकोनातून विचार न करता त्यांच्या व्यक्तिमत्त्वामागील मानसिकता, विचारप्रक्रिया, प्रसंगानुरूप घेतलेले निर्णय आणि नेतृत्व कौशल्य यांचा वेगळ्या अंगाने वेध घेण्याचा प्रयत्न या ग्रंथातून करण्यात आला आहे.
या प्रकाशन सोहळ्यास उपमुख्यमंत्री सुनेत्रा पवार, आमदार भीमराव अण्णा तापकीर, पत्रकार कल्याणराव अवताडे, श्रीनाथ भिमाले यांच्यासह विविध क्षेत्रांतील मान्यवर उपस्थित होते.
छत्रपती शिवाजी महाराजांच्या कार्याचा आणि विचारांचा अभ्यास नव्या पिढीपर्यंत वेगळ्या दृष्टिकोनातून पोहोचविण्याच्या उद्देशाने जयंतराव जाधव यांनी हा संशोधनात्मक लेखनप्रपंच केला आहे. दोन वर्षांच्या सातत्यपूर्ण मेहनतीनंतर त्यांच्या अभ्यासाला ग्रंथाचे स्वरूप प्राप्त झाल्याने हा ग्रंथ इतिहासप्रेमी, अभ्यासक आणि वाचकांसाठी निश्चितच उत्सुकतेचा विषय ठरणार आहे.
एका वेगळ्या विषयाची निवड, संशोधनाची जोड आणि अभ्यासपूर्ण मांडणी यातून साकारलेल्या या ग्रंथाच्या प्रकाशनामुळे पत्रकार जयंतराव जाधव यांच्या साहित्यिक व संशोधनात्मक प्रवासातील एक महत्त्वपूर्ण टप्पा पूर्ण झाला आहे.
