धाराशिव : धाराशिव जिल्ह्यातील येडशी गावात दिवाळीच्या सणादरम्यान घडलेल्या भीषण अग्निदुर्घटनेने संपूर्ण महाराष्ट्र हादरला आहे. ८ नोव्हेंबरच्या मध्यरात्री करंडे कुटुंबीयांच्या घराला लागलेल्या आगीत एकाच कुटुंबातील सहा जणांचा दुर्दैवी मृत्यू झाला, तर एक जण या दुर्घटनेतून बचावला. दिवाळीचा सण साजरा करण्यासाठी बाहेरगावी शिक्षण घेणाऱ्या मुलीही घरी आल्या होत्या. मात्र, आनंदाच्या या क्षणांचे रूपांतर काही वेळातच काळीज पिळवटून टाकणाऱ्या शोकांतिकेत झाले.
या दुर्घटनेनंतर घटनास्थळी सर्वप्रथम पोहोचलेल्या गावकऱ्यांनी त्या रात्रीचा अंगावर शहारे आणणारा घटनाक्रम सांगितला आहे. प्रत्यक्षदर्शींच्या माहितीनुसार, घराच्या खालच्या मजल्यावर असलेल्या दुकानाच्या बाहेरील बाजूने आगीला सुरुवात झाली. काही क्षणांतच आगीने रौद्र रूप धारण केले आणि घराबाहेर पडण्याचा मुख्य मार्ग आगीच्या विळख्यात सापडला. त्यामुळे घरातील सदस्यांना बाहेर पडण्याची संधीच मिळाली नाही.
नारळ आणि पिंपळाचे झाडही शेंड्यापर्यंत जळाले!
प्रत्यक्षदर्शी गावकऱ्यांनी दिलेल्या माहितीनुसार, आगीच्या ज्वाळा इतक्या प्रचंड होत्या की घरासमोरील नारळाचे आणि पिंपळाचे झाडदेखील शेंड्यापर्यंत जळून गेले. पहिल्या मजल्यावर असलेल्या दोघांचा आगीत होरपळून मृत्यू झाला. त्यांची अवस्था अत्यंत विदारक होती. तर वरच्या मजल्यावर असलेल्या अन्य चौघांचा धुरामुळे गुदमरून मृत्यू झाल्याची माहिती समोर आली आहे. आगीत घरातील किराणा दुकान, कॉस्मेटिकचे दुकान आणि कपड्याचे दुकान पूर्णपणे जळून खाक झाले.
भिंती फोडून बचावाचे प्रयत्न; मात्र आवाज येणेही झाले बंद!
आगीची माहिती मिळताच गावकऱ्यांनी घटनास्थळी धाव घेतली. घरातील सदस्यांना वाचवण्यासाठी स्थानिकांनी जेसीबीच्या सहाय्याने भिंती फोडण्यास सुरुवात केली. हातोड्यानेही भिंती तोडून धूर बाहेर काढण्याचा प्रयत्न करण्यात आला. सुरुवातीला घराच्या आतून मदतीसाठी आवाज येत होते. त्यामुळे गावकऱ्यांनी बचावकार्य अधिक वेगाने करण्याचा प्रयत्न केला. मात्र, काही वेळानंतर आतून येणारे आवाज बंद झाले. हा क्षण अत्यंत वेदनादायी असल्याचे प्रत्यक्षदर्शींनी सांगितले.
अग्निशमन दलाच्या विलंबावर गावकऱ्यांचा संताप
या दुर्घटनेनंतर अग्निशमन दलाच्या उशिरा झालेल्या आगमनावरून गावकऱ्यांनी तीव्र नाराजी व्यक्त केली आहे. स्थानिकांच्या आरोपानुसार, अग्निशमन दलाच्या वाहनात पुरेसे पाणी आणि डिझेल उपलब्ध नव्हते. त्यामुळे घटनास्थळी पोहोचल्यानंतरही पाणी आणि डिझेल भरण्यासाठी वेळ गेला. परिणामी आग आटोक्यात आणण्याच्या प्रयत्नांना विलंब झाला. अग्निशमन दलाची गाडी वेळेत दाखल झाली असती, तर कदाचित तीन ते चार जणांचे प्राण वाचवता आले असते, अशी भावना गावकऱ्यांनी व्यक्त केली आहे.
पणतीमुळे आग लागल्याचा प्राथमिक अंदाज
दिवाळीनिमित्त घरात लावलेल्या पणतीमुळे आग लागली असावी, असा प्राथमिक अंदाज व्यक्त केला जात आहे. मात्र, आगीचे नेमके कारण अद्याप स्पष्ट झालेले नाही. या दुर्घटनेतील सहाही मृतदेह धाराशिव येथील शासकीय रुग्णालयात दाखल करण्यात आले होते.
दिवाळीच्या प्रकाशमय सणात एका हसत्या-खेळत्या कुटुंबाचा असा दुर्दैवी अंत झाल्याने येडशी गावासह संपूर्ण धाराशिव जिल्ह्यावर शोककळा पसरली आहे. प्रत्यक्षदर्शींनी सांगितलेला त्या मध्यरात्रीचा घटनाक्रम मन सुन्न करणारा असून, अग्निसुरक्षा आणि आपत्कालीन यंत्रणेच्या तत्परतेबाबतही गंभीर प्रश्न उपस्थित होत आहेत.
