सामाजिक जगतातील प्रेरणापत्र   मराठी | English  
सामाजिक जगतातील प्रेरणापत्र  मराठी | English  
 ब्रेकिंग न्यूज:
  • : महाराष्ट्रात थंडी जोर धरणार; पुढच्या ५ दिवसांचा हवामान अंदाज आला समोर, अक्वान चक्रीवादळाचा परिणाम नाही
  • टीम इंडियाचा 306 धावांनी विजय, नेपाळचा संघ 26 धावांवर बाद, प्रिन्स यादव, हर्षित राणाच्या गोलंदाजीसमोर नेपाळच्या फलंदाजीचा पालापाचोळा
  • सरकार आणि शिवसेना शेतकऱ्यांसोबत, कोणतंही वेडंवाकडं पाऊल उचलू नका; एकनाथ शिंदेंचं पंढरपुरातून आवाहन
 शहर

पुण्यात अतिक्रमणधारकांना महापालिकेचा दणका! सिंहगड रोडवरील प्रसिद्ध खाऊ गल्लीवर धडक कारवाई; रस्ते-पदपथ मोकळे करण्यासाठी प्रशासन आक्रमक

डिजिटल पुणे    21-11-2026 19:05:39

पुणे : पुणे शहरातील वाढती वाहतूक कोंडी, रस्त्यांवर होणारी गर्दी आणि पदपथांवरील अतिक्रमणांचा प्रश्न ऐरणीवर आला असतानाच पुणे महानगरपालिकेने आता अतिक्रमणधारकांविरोधात आक्रमक भूमिका घेतली आहे. शहरातील रस्ते आणि पदपथ नागरिकांसाठी मोकळे करण्याच्या उद्देशाने महापालिकेने विशेष अतिक्रमणविरोधी मोहीम हाती घेतली असून, या मोहिमेचा वेग दिवसेंदिवस वाढताना दिसत आहे. सिंहगड रोड क्षेत्रीय कार्यालयाच्या हद्दीतही महापालिकेच्या पथकाने धडक कारवाई करत अनधिकृत अतिक्रमणांवर कारवाईचा बडगा उगारला आहे. सिंहगड रस्त्यावरील खवय्यांचे आवडते ठिकाण असलेल्या प्रसिद्ध खाऊ गल्लीतील अतिक्रमणांवरही प्रशासनाने हातोडा चालविला आहे.

पुणे शहरात वाहनांची संख्या दिवसेंदिवस वाढत असून, त्यातच रस्त्यांच्या कडेला आणि पदपथांवर उभारण्यात आलेले अनधिकृत स्टॉल्स, शेड, हातगाड्या आणि तात्पुरत्या स्वरूपातील बांधकामांमुळे वाहतुकीचा प्रश्न अधिक गंभीर होत आहे. अनेक ठिकाणी पादचाऱ्यांसाठी असलेले पदपथच विक्रेत्यांच्या ताब्यात गेल्याने नागरिकांना जीव मुठीत धरून रस्त्यावरून चालावे लागत आहे. या परिस्थितीची दखल घेत महापालिका आयुक्त नवलकिशोर राम यांनी रस्ते, पदपथ, फ्रंट मार्जिन आणि साइड मार्जिनवरील अतिक्रमणे हटविण्याचे स्पष्ट निर्देश दिले आहेत.

 

 

सलग चौथ्या दिवशीही कारवाईचा धडाका

महापालिकेच्या अतिक्रमण विभागाकडून गेल्या चार दिवसांपासून शहराच्या विविध भागांत विशेष मोहीम राबविण्यात येत आहे. या मोहिमेत सार्वजनिक जागांवर अनधिकृतपणे उभारण्यात आलेली शेड, हातगाड्या, पत्र्याची बांधकामे आणि वाहतुकीला अडथळा ठरणाऱ्या इतर संरचना हटविण्यात येत आहेत. याच मोहिमेअंतर्गत सिंहगड रोड क्षेत्रीय कार्यालयाच्या हद्दीतील खाऊ गल्ली परिसरात महापालिकेच्या पथकाने कारवाई केली. अचानक सुरू झालेल्या या मोहिमेमुळे परिसरातील विक्रेते आणि व्यावसायिकांमध्ये एकच धावपळ उडाली.

खाऊ गल्लीतील गर्दीमुळे वाहतुकीवर परिणाम

सिंहगड रोडवरील खाऊ गल्ली ही खाद्यप्रेमी पुणेकरांसाठी आकर्षणाचे ठिकाण मानली जाते. या परिसरात खाद्यपदार्थांचे अनेक स्टॉल्स असून, विशेषतः सायंकाळच्या वेळी येथे खवय्यांची मोठी गर्दी जमते. मात्र, या गर्दीसोबतच रस्त्याच्या कडेला आणि पदपथांवर वाढलेल्या अतिक्रमणांमुळे वाहतुकीला अडथळे निर्माण होत असल्याच्या तक्रारी सातत्याने समोर येत होत्या. अनेक ठिकाणी पादचाऱ्यांना चालण्यासाठी पुरेशी जागा उपलब्ध होत नव्हती. परिणामी, नागरिकांना मुख्य रस्त्यावरून चालण्याची वेळ येत होती. त्यामुळे सार्वजनिक जागांचा योग्य वापर व्हावा आणि वाहतुकीचा खोळंबा टाळता यावा, यासाठी महापालिकेने ही कारवाई केल्याचे स्पष्ट होत आहे.

 

 

लक्ष्मी रस्त्यावरील कारवाईनंतर प्रशासनावर प्रश्नचिन्ह

दरम्यान, महापालिकेच्या अतिक्रमणविरोधी मोहिमेवरून काही दिवसांपूर्वीच लक्ष्मी रस्त्यावर मोठा वाद निर्माण झाला होता. अतिक्रमणे हटविण्याच्या आदेशानंतर प्रत्यक्षात रस्त्यावरील अडथळे दूर करण्याऐवजी दुकानांच्या नामफलकांवरच कारवाई करण्यात आल्याचा आरोप व्यापाऱ्यांनी केला होता. विश्रामबाग क्षेत्रीय कार्यालय आणि आकाशचिन्ह विभागाच्या कारवाईत सुमारे ४० ते ५० दुकानांच्या दर्शनी भागांचे नुकसान झाल्याचा दावा व्यापाऱ्यांनी केला होता. या कारवाईविरोधात व्यापाऱ्यांनी तीव्र नाराजी व्यक्त करत विरोध दर्शविल्यानंतर प्रशासनाला माघार घेत कारवाई थांबवावी लागली होती. तसेच व्यापाऱ्यांना आठ दिवसांची मुदत देण्यात आली होती.

महापौरांचीही कारवाईवर नाराजी

लक्ष्मी रस्त्यावरील या प्रकाराची महापौर मंजूषा नागपुरे यांनीही दखल घेतली होती. महापालिका आयुक्तांचे आदेश रस्ते आणि पदपथांवरील अतिक्रमणे हटविण्याबाबत स्पष्ट असताना केवळ दुकानांच्या नामफलकांवर कारवाई करून व्यापाऱ्यांना त्रास देणे योग्य नसल्याचे त्यांनी म्हटले होते. संबंधित चुकीच्या कारवाईची दखल आयुक्त घेतील, असेही त्यांनी स्पष्ट केले होते. त्याचवेळी शहरातील अतिक्रमण हटविण्याची मोहीम मात्र सुरूच राहणार असल्याची भूमिका त्यांनी मांडली होती.

अतिक्रमण हटविण्याबरोबरच पुनरावृत्ती रोखण्याचे आव्हान

सिंहगड रोडवरील खाऊ गल्लीतील कारवाईमुळे महापालिकेने अतिक्रमणविरोधी मोहिमेला पुन्हा गती दिल्याचे चित्र आहे. मात्र, केवळ एक-दोन दिवस कारवाई करून प्रश्न सुटणार नाही. अतिक्रमणे हटविल्यानंतर त्याच जागेवर पुन्हा हातगाड्या, स्टॉल्स आणि अनधिकृत बांधकामे उभी राहणार नाहीत, यासाठी प्रशासनाला सातत्याने लक्ष ठेवावे लागणार आहे. शहरातील सर्व प्रमुख रस्ते आणि पदपथ अतिक्रमणमुक्त करण्यासाठी महापालिका किती सातत्याने कारवाई करते, याकडे आता पुणेकरांचे लक्ष लागले आहे.

रस्ते मोकळे, पदपथ नागरिकांसाठी खुले आणि वाहतूक सुरळीत व्हावी, ही पुणेकरांची अपेक्षा आहे. त्यामुळे अतिक्रमण हटविण्याची मोहीम केवळ दिखाव्यापुरती न राहता ती कायमस्वरूपी परिणामकारक ठरणार का, हे पाहणे महत्त्वाचे ठरणार आहे.


 Give Feedback



 जाहिराती