नेरल, पुणे – नेरल ते माथेरान दरम्यान धावणारी ऐतिहासिक टॉय ट्रेन, म्हणजेच‘माथेरानची क्वीन’, ही सेवा १ जून २०२५ पासून तब्बल सुमारे चार महिने बंद राहणार आहे. मध्य रेल्वे प्रशासनाने पावसाळी भूस्खलन आणि सुरक्षा कारणास्तव ही सेवा १५ ऑक्टोबर २०२५ पर्यंत थांबवण्याचा निर्णय घेतला आहे.मे महिन्याच्या अखेरीस झालेल्या मुसळधार पावसामुळे अमन लॉज ते वॉटर पाइप स्थानकादरम्यान भूस्खलन झाल्याचे निष्पन्न झाले असून, यामुळे प्रवाशांच्या सुरक्षेच्या दृष्टीने ही टॉय ट्रेन सेवा तात्पुरती थांबवण्यात आली आहे.
पर्यायी प्रवास व्यवस्था:
टॉय ट्रेनची मुख्य सेवा बंद असली तरी, अमन लॉज ते माथेरान दरम्यानची टॉय ट्रेनची शटल सेवा नियमितपणे सुरू राहणार आहे. त्यामुळे स्थानिक रहिवासी आणि पर्यटक यांना माथेरानपर्यंत पोहोचण्याची सुविधा मिळणार आहे.तसेच, मालवाहतूक सेवा दररोज सकाळी ८:२० वाजता नेरल स्थानकावरून सुरू होईल. शनिवार आणि रविवार वगळता ही सेवा नियमितपणे उपलब्ध राहील. मालगाडी सूर्यास्तापूर्वी परत येणार आहे.
माथेरानला जाणाऱ्या पर्यटकांसाठी सूचना:
सेवा बंद असलेल्या कालावधीत पर्यटकांनी नेरलहून वाहनाने अमन लॉजपर्यंत प्रवास करावा लागेल. त्यानंतर माथेरान हे वाहनमुक्त क्षेत्र असल्याने, पायी चालत, घोड्याने, अमन लॉज पासून टॉय ट्रेनने किंवा हातगाडीने प्रवास करावा.
मध्य रेल्वेने दिलेल्या माहितीनुसार, १५ ऑक्टोबरनंतर मार्गाची तपासणी आणि दुरुस्ती पूर्ण झाल्यानंतरच टॉय ट्रेन सेवा पुन्हा सुरू केली जाईल. पर्यटकांनी आणि प्रवाशांनी प्रशासनाने दिलेल्या सूचनांचे पालन करून सहकार्य करावे, असे आवाहन करण्यात आले आहे.
.JPG)
