बेंगळुरु  : घाईघाईनं केलेलं सेलिब्रेशन आणि विजयी मिरवणूक रॉयल चॅलेंजर्स बंगळुरुसाठी महागात पडल्याचं दिसून येत आहे. विजय परेडला सुरक्षा देण्यास नकार देणाऱ्या बेंगळुरु पोलिसांनी शुक्रवारी मुख्यमंत्री सिद्धरामय्या यांच्या आदेशानंतर कर्नाटकातून निखिल सोसाळे, किरण कुमार आणि सुनील मॅथ्यू यांना अटक केली. निखिल सोसाळे हे रॉयल चॅलेंजर्स बंगळुरु संघाचे मार्केटिंग आणि महसूल प्रमुख म्हणून काम करतात. रिपोर्ट्सनुसार, निखिल बेंगळुरुहून मुंबईला जाण्यासाठी विमानतळावर गेला होता. एक दिवस आधी दाखल केलेल्या एफआयआरमध्ये रॉयल चॅलेंजर्स बंगळुरु संघाचं नावही समाविष्ट करण्यात आलं होतं. अशाप्रकारे, आरसीबीच्या अडचणी वाढत असल्याचं दिसून येत आहे.

 3 जून रोजी पंजाब किंग्जचा 6 धावांनी पराभव करुन रॉयल चॅलेंजर्स बंगळुरुनं 18 वर्षांत प्रथमच आयपीएलचं विजेतेपद जिंकण्यात यश मिळवलं. यानंतर, उत्साहात असलेल्या संघानं 4 जून रोजी सकाळी सोशल मीडियावर एका पोस्टमध्ये उत्सवाची वेळ आणि विजय परेडची घोषणा केली. मात्र कर्नाटक पोलिसांकडून विजय परेड नाकारण्यात आली, तर स्टेडियममध्ये उत्सव साजरा करण्यास परवानगी देण्यात आली. असं असूनही, स्टेडियममध्ये सुमारे 3 लाख लोक जमले होते, तर स्टेडियमची क्षमता फक्त 35 हजार आहे. गेट क्रमांक 1 वर चेंगराचेंगरी झाली ज्यामध्ये 11 चाहत्यांचा मृत्यू झाला तर सुमारे 50 चाहते जखमी झाले.

अटक करण्यात आलेला किरण हा एक वरिष्ठ कार्यक्रम व्यवस्थापक आहे आणि मॅथ्यू हा व्यवसाय व्यवहार विभागाचा उपाध्यक्ष म्हणून काम करतो. गुरुवारी, कर्नाटकच्या मुख्यमंत्र्यांनी आरसीबी, डीएनए आणि कर्नाटक राज्य क्रिकेट असोसिएशनच्या अधिकाऱ्यांना अटक करण्याचे आदेश दिले होते. त्यांनी बेंगळुरुचे पोलिस आयुक्त बी. यांचीही भेट घेतली. दयानंद यांनी अतिरिक्त आयुक्त (पश्चिम) विकास कुमार विकास, डीसीपी (मध्य) शेखर एच. टेकन्नावर आणि क्यूबन पार्क पोलिस स्टेशनच्या इतर कनिष्ठ अधिकाऱ्यांसह अनेक उच्च पोलीस अधिकाऱ्यांना तात्काळ निलंबित करण्याची घोषणा केली होती.

 कर्नाटकच्या मुख्यमंत्र्यांनी गुरुवारी सांगितलं होतं, कालच्या दुःखद घटनेची चौकशी एक सदस्यीय न्यायिक आयोगाकडे सोपवण्याचा निर्णय मंत्रिमंडळाने घेतला आहे. या आयोगाचे अध्यक्ष कर्नाटक उच्च न्यायालयाचे निवृत्त न्यायाधीश मायकल डी'कुन्हा असतील. आम्ही आयोगाला 20 दिवसांत अहवाल सादर करण्यास सांगितलं आहे आणि राज्याचे आयजीपी (पोलीस महानिरीक्षक) आणि डीजीपी (पोलीस महासंचालक) यांना आरसीबी प्रतिनिधी, डीएनए इव्हेंट मॅनेजर्स आणि केएससीए व्यक्तीला तात्काळ अटक करण्याचे निर्देश दिल्याचं कर्नाटकच्या मुंख्यमंत्र्यांनी सांगितलं होतं.