मुंबई : ‘राज’ चित्रपटातून भेटीस आलेला अभिनेता डिनो मोरिया सध्या कायद्याच्या कचाट्यात अडकला आहे. कोट्यवधी रुपयांच्या घोटाळ्यात अभिनेत्याचं नाव समोर आलं आहे. मिठी नदी घोटाळ्याशी संबंधित मनी लाँड्रिंग प्रकरणाच्या संदर्भात अंमलबजावणी संचालनालयाने (ईडी) शुक्रवारी त्याच्या घरावर छापा टाकला. याप्रकरणी तीन पालिका अधिकारी, पाच कंत्राटदार, तीन मध्यस्थी व दोन कंपन्यांविरोधात गुन्हा दाखल करण्यात आला होता.

मुंबईत पूर प्रतिबंधक गाळ पुशर आणि ड्रेनेज कामांसाठी वाटप केलेल्या ड्रेजिंग मशीनच्या खरेदीत गैरव्यवहार झाल्याचे पुरावे गोळा करण्यासाठी ईडीचे अधिकारी आर्थिक कागदपत्रे, इलेक्ट्रॉनिक डेटा आणि व्यवहारांच्या नोंदी तपासत आहेत. याप्रकरणी ईडीने शुक्रवारी मुंबई आणि कोचीमधील १५ ठिकाणी छापे टाकले. ज्यात मोरिया, बीएमसीचे सहाय्यक अभियंता प्रशांत रामुगडे आणि अनेक कंत्राटदारांच्या मालमत्तांचा समावेश आहे.

मिठी नदीचा गाळ काढण्याच्या प्रकल्पातील कथित अनियमितता आणि निधीच्या कथित गैरवापर प्रकरणात अंमलबजावणी संचालनालयाने शुक्रवारी बॉलीवूड अभिनेता डिनो मोरियाच्या मुंबईतील घरावर छापे टाकले आहेत. तसेच अभिनेत्याव्यतिरिक्त, बीएमसीचे सहाय्यक अभियंता प्रशांत रामुगडे आणि अनेक कंत्राटदारांच्या जागेवर छापे टाकण्यात आले आहेत. याप्रकरणी त्याची याआधी मुंबई पोलिसांकडून चौकशीसुद्धा करण्यात आली होती. डिनो मोरिया आणि त्याचा भाऊ सॅन्टिनो यांना काही कागदपत्रांसह उपस्थित राहण्यासाठी आर्थिक गुन्हे शाखेनं सांगितलं होतं. डिनो मोरिया हा शिवसेना (ठाकरे गट) युवानेते आणि आमदार आदित्य ठाकरे यांचा निकटवर्तीय मानला जातो.

मिठी नदी गाळ उपसा घोटाळ्याप्रकरणी ईडीने 15 हून अधिक ठिकाणी छापे टाकल्याची माहिती समोर येत आहे. यात मुंबई आणि केरळमधील कोची इथल्या ठिकाणांचा समावेश आहे. महापालिका निवडणुकांपूर्वी ठाकरे गटाला अडचणीत आणण्यासाठी हा प्रकार सुरू असल्याची जोरदार चर्चा आहे. याप्रकरणी तीन पालिका अधिकारी, पाच कंत्राटदार, तीन मध्यस्थ आणि दोन कंपन्यांविरोधात आझाद मैदान पोलीस ठाण्यात गुन्हा दाखल करण्यात आला होता.

या गैरव्यवहारामुळे पालिकेला 65 कोटी 54 लाख रुपयांचं नुकसान झाल्याचा आरोप आहे. डिनो मोरिया आणि त्याच्या भावाची आर्थिक गुन्हे शाखेनं जवळपास आठ तास चौकशी केली होती. याप्रकरणी अटकेत असलेला आरोपी केतन कदम आणि डिनो मोरिया यांच्यात 2019 आणि 2022 या कालावधीत अनेक आर्थिक व्यवहार आहेत. त्याबाबत आर्थिक गुन्हे शाखा चौकशी करत आहे.