पुणे : संत ज्ञानेश्वर महाराज आणि संत तुकाराम महाराज आषाढी वारी पालखी सोहळा काही दिवसांवर येऊन ठेपला आहे. १८ आणि १९ जूनला दोन्ही पालख्यांचे प्रस्थान होणार आहे. त्यामुळे राज्यभरातून येणाऱ्या वारकऱ्यांसाठी पुणे महानगर परिवहन महामंडळाकडून (पीएमपीएमएल) जादा बसची सोय करण्यात आली आहे.

आषाढी वारी पालखीनिमित्त प्रस्थान सोहळ्यास पुण्यासह अन्य भागातून राज्यभरातून आळंदी व देहू येथे जाणाऱ्या असंख्य भाविक नागरिकांचे वाहतुकीची व्यवस्था नेहमीच्या बसशिवाय जादा बस देऊन पीएमपीएमएलकडून यंदाही करण्यात आली आहे. भाविक व नागरिकांच्या सोयीसाठी १६ जून ते २० जूनपर्यंत आळंदीसाठी स्वारगेट, महापालिका, हडपसर, पुणे स्टेशन, निगडी, भोसरी, हिंजवडी, चिंचवड, पिंपरी रोड या ठिकाणावरून सध्या संचलनात असणाऱ्या बस व जादा बस अशा प्रतिदिनी एकूण १४६ बस संचलनात राहणार आहेत.  १९ जून रात्री १२ वाजेपर्यंत आळंदीसाठी बसची व्यवस्था करण्यात आलेली आहे. याशिवाय देहूसाठी पुणे स्टेशन, म.न.पा., निगडी, या ठिकाणांवरून सध्याच्या संचलनात असणाऱ्या बस व जादा बस अशा एकूण १४६ बस देण्यात आलेल्या आहेत. याशिवाय देहू ते आळंदी अशा २३ बस ठेवण्यात आलेल्या आहेत.

२० जून रोजी पालखी प्रस्थान आळंदीमधून होत असल्यामुळे पहाटे ३ पासून स्वारगेट, पुणे स्टेशन, हडपसर, महापालिका या ठिकाणावरून आळंदीला जाण्यासाठी जादा १६ बसची व्यवस्था करण्यात आलेली आहे. याव्यतिरिक्त नेहमीच्या संचलनात असणाऱ्या बस सकाळी साडेपाच वाजल्यापासून पुणे व पिंपरी- चिंचवड परिसरातील बस स्थानकावरून नेहमीच्या मार्गावरील ११३ बस आळंदीसाठी भोसरी व विश्रांतवाडीपर्यंत भाविकांच्या सेवेसाठी संचलनात राहणार आहेत. याशिवाय जादा बसची व्यवस्था ही प्रवाशांच्या गरजेनुसार (प्रवासीसंख्या किमान ४० आवश्यक) देण्यात येईल. तसेच, पुण्याहून पालख्या प्रस्थानाच्या वेळेस २२ जून रोजी हडपसरमध्ये पालख्या दर्शनासाठी दुपारी १२ ते १ दरम्यान थांबणार असल्याने अशा वेळेस महात्मा गांधी स्थानक येथून पुणे स्टेशन, वारजे माळवाडी, कोथरूड डेपो, निगडी, चिंचवड, आळंदी इत्यादी ठिकाणी जाण्यासाठी बससेवा देण्याची व्यवस्था करण्यात आलेली आहे.

तसेच, कात्रज-कोंढव्याकडे जाण्यासाठी शिवरकर गार्डन येथून आणि मुंढवा, चंदननगर व वाघोलीसाठी मगरपट्टा येथील बससेवा देण्याची व्यवस्था करण्यात आली आहे. तद्दनंतर पालखी प्रस्थान सोहळा सोलापूर व सासवड रोडने मार्गस्थ होईल. अशा वेळी सोलापूर-उरुळी कांचन मार्ग जसा जसा वाहतुकीसाठी खुला होईल तस-तशी बस वाहतूक चालू ठेवण्यात येईल.

दिवेघाटातील वाहतूक बोपदेव घाटमार्गे

हडपसर ते सासवड दरम्यानचा दिवेघाट हा रस्ता वाहतुकीस पूर्णत: बंद राहणार आहे. तथापि, प्रवासी, भाविकांच्या वाहतुकीच्या सोईसाठी म्हणून सदर मार्गांची बस वाहतूक पर्यायी मार्गाने म्हणजेच दिवेघाटाऐवजी बोपदेव घाट मार्गे अशी चालू ठेवण्यात येणार असून, सदर बसचे संचलन स्वारगेट, पुणे स्टेशन, हडपसर असे राहणार असून अशा ६० जादा बसचे नियोजन करण्यात आलेले आहे, तरी सदर बस वाहतुकीबाबतची नोंद सर्व संबंधित भाविक व इतर प्रवासी नागरिकांनी घेऊन त्याचा लाभ घ्यावा आणि सहकार्य करावे, असे आवाहन पीएमपीएमएलकडून करण्यात येत आहे