नवी दिल्ली : १५ जुलैपासून दुचाकी वाहनांना देखील टोल भरावा लागणार असल्याची बातमी काही माध्यमांमध्ये मोठ्या प्रमाणात व्हायरल होत आहे. मात्र, केंद्रीय रस्ते वाहतूक आणि महामार्ग मंत्री नितीन गडकरी यांनी यावर स्पष्ट भूमिका घेत या बातम्यांना पूर्णतः खोटे आणि निराधार ठरवले आहे.

गडकरी यांनी ट्विटर आणि माध्यमांमार्फत प्रतिक्रिया देत सांगितले की, “काही मीडिया हाऊसेसद्वारे दुचाकी (Two Wheeler) वाहनांवर टोल लावण्याच्या संदर्भात भ्रामक बातम्या पसरविल्या जात आहेत. असा कोणताही निर्णय प्रस्तावित नाही. दुचाकी वाहनांना टोलमधून पूर्ण सूट पूर्वीप्रमाणेच कायम राहील. सत्यता न पडताळता अशा भ्रामक बातम्या पसरवून खळबळ निर्माण करणे ही सुदृढ पत्रकारितेची निशाणी नाही. मी अशा वृत्तांकनाचा निषेध करतो. दुचाकी वाहनांना टोल लावण्याचा कोणताही प्रस्ताव सरकारकडे नाही. काही माध्यमांनी चुकीच्या माहितीच्या आधारे ही खोटी बातमी पसरवली आहे.”

या अफवेमुळे देशभरातील मोटरसायकल चालकांमध्ये संभ्रम निर्माण झाला होता. अनेक वाहनधारक सोशल मीडियावर आपला संताप व्यक्त करत होते. तथापि, गडकरी यांच्या स्पष्ट खुलाशानंतर दुचाकी चालकांना मोठा दिलासा मिळाला आहे.

गडकरींनी पुढे सांगितले की, “सरकार देशातील सामान्य नागरिकांवर अनावश्यक आर्थिक भार टाकण्याच्या विरोधात आहे. आम्ही दररोज प्रवास करणाऱ्या दुचाकीस्वारांना दिलासा देण्यासाठी कार्यरत आहोत, त्यांच्यावर टोल लावण्याचा प्रश्नच येत नाही.”दरम्यान, फ्री प्रेस जर्नलने देखील आपल्या वृत्तात नमूद केले आहे की, सद्यस्थितीत कोणत्याही प्रकारचा अधिकृत आदेश किंवा अधिसूचना दुचाकींवरील टोलसंदर्भात प्रसिद्ध झालेली नाही.

थोडक्यात:

• दुचाकींना टोल लावण्याच्या अफवा खोट्या

• सरकारकडे असा कोणताही प्रस्ताव नाही

• नितीन गडकरींनी स्पष्टपणे दिले खंडन

• वाहनचालकांनी अफवांवर विश्वास ठेवू नये

वाहनचालकांना आवाहन – सत्य माहिती मिळवण्यासाठी केवळ अधिकृत सरकारी स्रोत किंवा डिजिटल पुणे न्यूज सारख्या खात्रीशीर माध्यमांवरच विश्वास ठेवा.