पुणेः पुण्यात एका महिलेने पुरुषावर अत्याचार केल्याची खळबळजनक घटना समोर आली आहे. कोथरूड पोलीस स्टेशनमध्ये महिलेविरुद्ध गुन्हा दाखल करण्यात आला आहे. आरोपी महिलेने गुंगीचे औषध देऊन कोल्हापूरच्या एका पुरुषावर अत्याचार केल्याचे आणि त्याचे अश्लील फोटो काढून पैशांची मागणी केल्याचे वृत्त आहे. आरोपी महिला वकील असल्याची बतावणी करत धमकी देत होती. पीडित व्यक्तीच्या घरीही बळजबरीचा प्रयत्न करण्यात आला आणि त्याला काशी विश्वनाथ येथे घेऊन जाऊन अत्याचार केल्याची माहिती आहे. पोलिसांनी गुन्हा दाखल करून पुढील तपास सुरू केला आहे.
पुण्यात पुन्हा एक सनसनाटी घटना समोर आली आहे. कोथरुड परिसरात एका महिलेने तरुणाला गुंगी आणणारे औषध देऊन जबरदस्ती केल्याचा गंभीर आरोप झाला आहे. पीडित तरुणाने पोलिसांकडे दिलेल्या माहितीप्रमाणे, आरोपी महिला स्वतःला वकील असल्याचे सांगत कायद्याचे भय दाखवत त्या तरुणाला सतत धमकावत होती.
गुंगीच्या अवस्थेत त्याच्यावर अत्याचार करून तिने त्याचे खाजगी फोटो काढले आणि तेच फोटो व्हायरल करण्याची धमकी देत पैशांची मागणी सुरू केली. या मानसिक छळामुळे तरुण प्रचंड तणावाखाली होता.
घटना केवळ पुण्यातच न थांबता आरोपी महिला त्याच्या कोल्हापूरच्या घरीही पोहोचली. एवढेच नाही तर वाराणसी येथेही त्याला नेऊन दबाव टाकल्याचे तरुणाने तक्रारीत नमूद केले आहे.तक्रार मिळताच कोथरूड पोलिसांनी महिलेविरुद्ध गुंगीचे औषध देणे, जबरदस्ती करणे, फोटोद्वारे ब्लॅकमेल करणे आणि धमक्या देणे अशा गंभीर कलमांनुसार गुन्हा नोंदवला आहे. प्रकरणाचा सखोल तपास सुरू आहे.
