उरण : उरण नगरपालिकेच्या सत्तेसाठीची निर्णायक लढत  शिगेला पोहोचली असताना संपूर्ण शहरात राजकीय तापमान प्रचंड वाढले होते.दिनांक 2 डिसेंबर 2025 रोजी नागरिकांनी मतदान केले.उरण नगर परिषदेत एकूण 67.92  % मतदान झाले. सर्वत्र मतदान शांततेत पार पडले.मतदानानंतर कोणत्या पक्षाचा झेंडा नगरपालिका इमारतीवर फडकणार, याकडे सर्व उरणकरांचे डोळे लागले आहेत.निकाल 3 डिसेंबर 2025 रोजी लागणार होता मात्र उच्च न्यायालयाच्या निर्णया मुळे आता निकाल पुढे ढकलण्यात आला आहे.
उरण नगरपालिकेतील एकूण 10 प्रभागांतून 21 नगरसेवक आणि 1 नगराध्यक्षा अशा एकूण 22 पदांसाठी निवडणूक संपन्न झाली आहे. नगराध्यक्षा पद महिला राखीव असल्याने सर्व पक्षांच्या गणितात मोठी उलथापालथ झाली होती.योग्य महिला उमेदवारांच्या शोधासाठी पक्षांना धावाधाव करावी लागली. या निवडणुकीत 13,311 पुरुष आणि 12,903 महिला असे मिळून 26,214 मतदार होते.

 नगराध्यक्षा पद हे जनतेकडून थेट निवडून द्यायचे असल्याने मुख्य लढत अत्यंत चुरशीची बनली होती. महाविकास आघाडीतर्फे भावना घाणेकर या तुतारी वाजविणारा माणूस या चिन्हावर मैदानात होत्या , तर भाजपतर्फे शोभा कोळी या कमळ या चिन्हावर उमेदवारी लढवली. शिवसेना शिंदे गटाच्या रुपाली ठाकूर हे धनुष्यबाण या निशाणीवर आणि एक अपक्षही रिंगणात असले तरी खरी लढत भावना घाणेकर व शोभा कोळी यांच्यातच झाली आहे.उरणकरांच्या नजरा या दोन्ही महिला उमेदवारांच्या विजयाकडे खिळल्या आहेत.कोण नगराध्यक्ष बनणार याकडे सर्वांचे लक्ष लागले आहे.भाजप महायुती व महाविकास आघाडीचे उमेदवार यांच्यातच खरी लढत असल्याचे यावेळी दिसून आले.

 नगरसेवकांच्या 21 जागांवर महाविकास आघाडी व भाजप यातच मुख्य सामना झाला आहे. प्रभागनिहाय मतदारसंख्या पाहता प्रभाग 1 ते 9 मधून प्रत्येकी 2 नगरसेवक, तर प्रभाग 10 मधून 3 नगरसेवक निवडले जाणार आहेत.प्रभागनिहाय मतदारसंख्या पाहिली असता प्रभाग क्रमांक 1 मध्ये पुरुष 1605, महिला 1706 एकूण 3311, प्रभाग 2 मध्ये पुरुष 1549, महिला 1613 एकूण 3162, प्रभाग 3 मध्ये पुरुष 1252, महिला 1168 एकूण 2420, प्रभाग 4 मध्ये पुरुष 1416, महिला 1321 एकूण 2737, प्रभाग 5 मध्ये पुरुष 1298, महिला 1268 एकूण 2566, प्रभाग 6 मध्ये पुरुष 1010, महिला 1049 एकूण 2059, प्रभाग 7 मध्ये पुरुष 1566, महिला 1388 एकूण 2954, प्रभाग 8 मध्ये पुरुष 955, महिला 893 एकूण 1848, प्रभाग 9 मध्ये पुरुष 1148, महिला 1145 एकूण 2293 आणि प्रभाग 10 मध्ये पुरुष 1512, महिला 1352 एकूण 2864 अशी मतदारांची आकडेवारी आहे. या सर्व प्रभागांमध्ये चुरशीची लढत झाली आहे .

मंगळवार, दि. 2 डिसेंबर रोजी मतदान संपन्न झाले असून बुधवार, दि. 21 डिसेंबर रोजी नगरपालिका कार्यालयात निकाल जाहीर केला जाणार आहे. उरण नगरपालिकेच्या सत्तेचा तख्ता कोणाच्या बाजूने झुकणार, हे स्पष्ट होणार आहे.मागील निवडणुकीतील सत्तासंतुलन लक्षात घेता यंदाची निवडणूक अधिक तापलेली आणि चुरशीची होणार हे आधीच स्पष्ट झाले आहे. नेतेमंडळी अगोदरच विशेष लक्ष देऊन सज्ज झाली होती . मतदारांच्या मनात बदलाची अपेक्षा, नाराजी, विकासाच्या मागण्या सगळंच एका क्षणात मतदानयंत्रावर उमटले होते .

उरण नगर परिषद निवडणुकीतएकूण 29 मतदान केंद्र होते या केंद्रावर  शासनाचे 5 कर्मचारी व 1 पोलीस शिपाई तैनात होते. 4 पी आय, 31अधिकारी, 252 पोलीस कर्मचारी यांचा चोख बंदोबस्त यावेळी निवडणुकीत होता. कुठेही यावेळी गैरप्रकार झालेला नाही. मतदान शांततेत कायदेशीररित्या लोकशाही मार्गाने संपन्न झाली.
निवडणुकांचा निकाल पुढे गेल्याने नेते, पदाधिकारी कार्यकर्त्यांमध्ये नाराजी:- 

राज्यात आज नगरपरिषद आणि नगरपंचायत निवडणुकांसाठी मतदान होत असून या निवडणुकांचा निकाल उद्या जाहीर होणार होता. मात्र काही नगरपरिषदांच्या निवडणुका लांबणीवर पडल्याने आता निवडणूक निकालही पुढे ढकलण्याचा निर्णय मुंबई हायकोर्टाच्या नागपूर खंडपीठाकडून देण्यात आला आहे.राज्य निवडणूक आयोगाने जिल्हा कोर्टात अपील प्रलंबित असलेल्या किंवा नामनिर्देशन पत्र मागे घेण्यासाठी पुरेसा वेळ न मिळालेल्या ठिकाणी निवडणुका 20 डिसेंबरपर्यंत पुढे ढकलल्या आहेत. त्यामुळे या निवडणुकांसाठी मतदान झाल्यानंतर 21 डिसेंबर रोजी मतदान झालेल्या सर्व नगरपरिषद नगरपंचायतींचे निकाल जाहीर होतील.

राज्य निवडणूक आयोगाने २९ नोव्हेंबर रोजी एक परिपत्रक काढले. या परिपत्रकानुसार, ज्या ठिकाणी जिल्हा कोर्टात अपील सुरु आहे किंवा जिथे अपिलांचा निकाल लागण्यास उशीर झाला आणि उमेदवारांना अर्ज मागे घेण्यासाठी फक्त तीन दिवसांचाच अवधी मिळाला, अशा सर्व ठिकाणी निवडणुका पुढे ढकलण्यात आल्या आहेत.निकाल कधी लागेल याची उत्सुकता उरण नगर परिषदेचे नगराध्यक्ष पदाचे उमेदवार, नगरसेवक पदाचे उमेदवार यांच्यासह सर्वच राजकीय पक्षाच्या पदाधिकारी कार्यकर्त्यांना होती मात्र निकाल पुढे ढकलल्याने उरण मधील सर्वच राजकीय पक्षाचे नेते, पदाधिकारी कार्यकर्ते यांनी नाराजी व्यक्त केली आहे.