मुंबई: महाराष्ट्र लोकसेवा आयोगाने (MPSC) 21 डिसेंबर 2025 रोजी होणारी गट-ब (अराजपत्रित) संयुक्त पूर्व परीक्षा पुढे ढकलण्याचा निर्णय घेतला आहे. राज्यातील 246 नगरपालिका आणि 48 नगरपंचायतींच्या मतमोजणीचा दिवस 21 डिसेंबरला निश्चित झाल्याने, जिल्हाधिकाऱ्यांशी चर्चा करून परीक्षा पुढे ढकलण्याचा निर्णय घेण्यात आला.आयोगाने जारी केलेल्या शुद्धीपत्रकानुसार, गट-ब संयुक्त पूर्व परीक्षा आता 4 जानेवारी 2026 रोजी आणि गट-क संयुक्त पूर्व परीक्षा 11 जानेवारी 2026 रोजी आयोजित करण्यात येणार आहेत.

 महाराष्ट्र लोकसेवा आयोगाने सर्वच जिल्हाधिकारी यांच्याशी चर्चा केल्यानंतर हा निर्णय घेण्यात आला. त्यानुसार, नव्याने परीक्षेच्या तारखा जाहीर करण्यात आल्या असून 4 जानेवारी आणि 11 जानेवारी 2026 रोजी परीक्षा होणार आहे. महाराष्ट्र गट-ब (अराजपत्रित) सेवा संयुक्त पूर्व परीक्षा आणि महाराष्ट्र गट-क सेवा संयुक्त पूर्व परीक्षा 2025 अनुक्रमे 4 जानेवारी आणि 11 जानेवारी 2026 रोजी आयोजित करण्यात येत आहेत. यासंदर्भातील शुध्दीपत्रक आयोगाच्या संकेतस्थळावर प्रसिध्द करण्यात आले आहे, अशी माहिती आयोगाने दिली. त्यामुळे, परीक्षार्थी, उमेदवारांनी याची दखल घ्यायला हवी.

मतमोजणीमुळे अडचणी

महाराष्ट्र लोकसेवा आयोगामार्फत महाराष्ट्र गट-ब (अराजपत्रित) सेवा संयुक्त पूर्व परीक्षा- 2025च्या परीक्षेचे आयोजन 21 डिसेंबर 2025 रोजी सकाळी 111 ते 12 या वेळेत करण्यात आले होते. तथापि, राज्यातील नगर परिषद व नगर पंचायतीच्या सार्वत्रिक निवडणूका 2024 कार्यक्रमांतर्गत राज्य निवडणूक आयोगाच्या 2 डिसेंबर 2025 रोजीच्या आदेशानुसार मतमोजणी 21 डिसेंबर रोजी करण्याबाबत सर्व जिल्हाधिकारी यांना निर्देशित केले आहे. आयोगामार्फत आयोजित परीक्षा व मतमोजणी एकाच दिवशी म्हणजेच 21 डिसेंबर 2025 रोजी असल्याने त्यासंदर्भात काही मुद्यांच्या अनुषंगाने राज्यातील सर्व जिल्हाधिकारी कार्यालयांकडून माहिती मागविण्यात आली होती. संबंधित जिल्हाधिकाऱ्यांकडून आलेली माहिती आणि निकालाच्या पार्श्वभूमीवर परीक्षा पुढे ढकलण्याचा निर्णय घेण्यात आला आहे.

महाराष्ट्र लोकसेवा आयोगाने उपरोक्तप्रमाणे जिल्हाधिकारी यांचेकडून मागविलेल्या माहितीच्या अनुषंगाने, काही जिल्हा केंद्रावरील परीक्षा उपकेंद्र व मतमोजणीचे ठिकाण यामधील कमी अंतर, लाऊडस्पीकरचा आवाज, वाहतूक कोंडी, परीक्षेदरम्यान निघणाऱ्या विजयी उमेदवारांच्या मिरवणुका, तसेच परीक्षेच्या आयोजनाकरीता कर्मचाऱ्यांची कमतरता इत्यादी बाबी विचारात घेवून त्यांनी परीक्षा आयोजित करण्यास अडचणी उद्भवू शकतात असे कळविले आहे. सदर वस्तुस्थिती विचारात घेता प्रस्तुत परीक्षा नियोजित तारखेस न घेता पढे ढकलण्याचा आयोगाने निर्णय घेतल्याचे आयोगाने परिपत्रकाद्वारे कळवले आहे.

परीक्षार्थ्यांनी नोंद घ्यावी

4 आणि 11जानेवारीलाहोणार परीक्षा आयोगाच्या परपत्रकानुसार, एमपीएससी गट 'ब' संयुक्त सेवा पूर्व परीक्षेची नवी तारीख 4 जानेवारी 2026 रोजी ठेवण्यात आली आहे. तर, महाराष्ट्र गट 'क' ची संयुक्त सेवा पूर्व परीक्षा 11 जानेवारी 2026 रोजी घेण्यात येणार आहेत.आयोगाने सर्व उमेदवारांनी नव्या तारखा लक्षात घेऊन तयारी करावी, असे आवाहन केले आहे.शुद्धीपत्रक MPSC च्या अधिकृत संकेतस्थळावर प्रसिद्ध करण्यात आले आहे.