बीड : ट्युशनला जात असलेल्या अल्पवयीन मुलीला फिरायला नेण्याच्या बहाण्याने कारमध्ये बसवून निर्जन व डोंगराळ भागात नेऊन तिच्यावर अत्याचार केल्याची धक्कादायक घटना बीड जिल्ह्यातील केज तालुक्यात उघडकीस आली आहे. या घटनेमुळे संपूर्ण तालुक्यात खळबळ उडाली असून, आरोपीविरोधात केज पोलीस ठाण्यात गंभीर स्वरूपाचा गुन्हा दाखल करण्यात आला आहे.
मिळालेल्या माहितीनुसार, केज तालुक्यातील एका गावात राहणारी १५ वर्षीय मुलगी नेहमीप्रमाणे ट्युशनसाठी घराबाहेर पडली होती. याच वेळी तिच्या ओळखीच्या एका तरुणाने तिला फिरायला नेण्याचा बहाणा करत कारमध्ये बसवले. विश्वासाचा गैरफायदा घेत आरोपीने मुलीला तालुक्याबाहेरील निर्जन आणि डोंगराळ भागात नेले.
त्या ठिकाणी एकांताचा फायदा घेत आरोपीने अल्पवयीन मुलीच्या इच्छेविरुद्ध तिच्यावर अत्याचार केल्याचे प्राथमिक तपासात समोर आले आहे. घाबरलेल्या अवस्थेत मुलगी घरी पोहोचल्यानंतर तिने संपूर्ण प्रकार पालकांना सांगितला. त्यानंतर पालकांनी तात्काळ केज पोलीस ठाण्यात धाव घेत तक्रार दाखल केली.
तक्रारीच्या आधारे पोलिसांनी संबंधित आरोपीविरोधात गुन्हा नोंदवला असून, पुढील तपास सुरू आहे. या घटनेमुळे केज तालुक्यासह परिसरात संताप व्यक्त केला जात असून, आरोपीला तात्काळ अटक करून कठोरात कठोर शिक्षा देण्याची मागणी नागरिकांकडून होत आहे. अल्पवयीन मुलींच्या सुरक्षिततेचा प्रश्न पुन्हा एकदा ऐरणीवर आला आहे.
