मुंबई : मुंबईची जीवनवाहिनी असलेली लोकल रेल्वे पुन्हा एकदा प्रवाशाच्या मृत्यूमुळे चर्चेत आली आहे. लोकलमधील प्रचंड गर्दी आणि प्रशासनाच्या अपयशी नियोजनामुळे आणखी एका प्रवाशाला आपला जीव गमवावा लागल्याची दुर्दैवी घटना घडली आहे. धावत्या लोकलमधून खाली पडून मनीष बाळू लोखंडे (वय अंदाजे ३५) या प्रवाशाचा मृत्यू झाला असून या घटनेमुळे सर्वत्र हळहळ व्यक्त केली जात आहे.
ही घटना रविवारी दुपारी नाहूर रेल्वे स्थानक परिसरात घडली. मध्य रेल्वेवर दर रविवारी सिग्नल व रुळांच्या देखभाल-दुरुस्तीसाठी जाहीर करण्यात येणाऱ्या मेगाब्लॉकमुळे लोकल वाहतूक विस्कळीत होते. परिणामी, स्थानकांवर प्रचंड गर्दी उसळते आणि प्रवाशांना दरवाजात लटकून प्रवास करण्याची वेळ येते. मनीष लोखंडे यांचा मृत्यू हा अशाच रविवार मेगाब्लॉकचा बळी असल्याचे रेल्वे कर्मचाऱ्यांचे म्हणणे आहे.
नेमकं काय घडलं?
मनीष बाळू लोखंडे हे माटुंगा येथील रेल्वे वर्कशॉपमध्ये टेक्निशियन म्हणून कार्यरत होते. रविवारी त्यांनी कुर्ला येथून बदलापूरसाठी लोकल पकडली होती. मात्र, लोकलमध्ये प्रचंड गर्दी असल्याने त्यांना दरवाजात लटकून प्रवास करावा लागला. लोकल दुपारी सुमारे १.५० वाजता नाहूर स्थानकाजवळ पोहोचत असताना अचानक त्यांचा तोल गेला आणि ते थेट रुळांवर कोसळले.
या अपघातात मनीष यांच्या डोक्याला व पायाला गंभीर दुखापत झाली. घटनेची माहिती मिळताच रेल्वे पोलिस व रेल्वे सुरक्षा दलाच्या कर्मचाऱ्यांनी त्यांना तातडीने जवळच्या खासगी रुग्णालयात दाखल केले. मात्र, उपचार सुरू असतानाच डॉक्टरांनी त्यांना मृत घोषित केले.
या प्रकरणी कुर्ला रेल्वे पोलिस ठाण्यात अपघाती मृत्यूची नोंद करण्यात आली असून पुढील तपास सुरू आहे. दरम्यान, लोकलमधील वाढती गर्दी, अपुरी वाहतूक व्यवस्था आणि रविवार मेगाब्लॉकमुळे प्रवाशांच्या जीवाला निर्माण होणारा धोका पुन्हा एकदा ऐरणीवर आला आहे.
