पुणे : पुण्यातील लोणी काळभोर परिसरात एक काळीज पिळवटून टाकणारी घटना घडली आहे. सोसायटीच्या आवारात सायकलवर खेळणाऱ्या पाच वर्षीय चिमुकल्याला कारची धडक बसून त्याचा दुर्दैवी मृत्यू झाला. ही घटना 19 जानेवारी रोजी दुपारी घडली असून, संपूर्ण प्रकार सोसायटीतील सीसीटीव्ही कॅमेऱ्यात कैद झाला आहे.
मिळालेल्या माहितीनुसार, निष्कर्ष आश्वत स्वामी (वय 5) हा मुलगा लोणी काळभोरमधील जॉय नेस्ट सोसायटीच्या पार्किंग परिसरात सायकलवर खेळत होता. याच वेळी त्या ठिकाणाहून जाणाऱ्या कारच्या समोर तो अचानक आल्याने चालकाला तो दिसला नाही आणि कारची धडक बसली. कारचा वेग कमी असतानाही धडकेमुळे निष्कर्ष गंभीर जखमी झाला.अपघातानंतर निष्कर्षला तातडीने खासगी रुग्णालयात दाखल करण्यात आले. मात्र उपचारांपूर्वीच डॉक्टरांनी त्याला मृत घोषित केले. या घटनेमुळे परिसरात हळहळ व्यक्त करण्यात येत आहे.
पोलिसांत गुन्हा दाखल
याप्रकरणी निष्कर्षचे वडील आश्वत नारायण स्वामी (वय 40, रा. जॉय नेस्ट सोसायटी, लोणी काळभोर) यांनी लोणी काळभोर पोलीस ठाण्यात फिर्याद दिली आहे. त्यांच्या तक्रारीवरून संबंधित कार चालकाविरुद्ध गुन्हा दाखल करण्यात आला असून, पुढील तपास पोलीस करत आहेत.ही घटना शहरातील सोसायटी परिसरात वाहन चालवताना विशेष खबरदारी घेण्याची गरज पुन्हा एकदा अधोरेखित करते.
