पुणे: शहरातील वाहतूक शिस्त अधिक मजबूत करण्यासाठी Pune Traffic Police यांनी थकीत ई-चलनांबाबत विशेष मोहीम जाहीर केली आहे. वाहनांवरील दंड ३० दिवसांच्या आत न भरल्यास संबंधित चालकाचा परवाना निलंबित करण्याचा प्रस्ताव Regional Transport Office (RTO) कडे पाठविण्यात येणार असल्याचा इशारा देण्यात आला आहे.

विशेष मोहीम आणि थेट कारवाई

मार्च २०१९ पासून शहरात ई-चलन प्रणाली कार्यान्वित आहे. सीसीटीव्ही कॅमेरे आणि डिजिटल यंत्रणेद्वारे नियमभंगाची नोंद करून दंड आकारला जातो. मात्र, मोठ्या प्रमाणावर वाहनचालकांनी दंडाची रक्कम प्रलंबित ठेवल्याचे आढळून आले आहे. यामुळे प्रलंबित दंड वसुली, नियमांचे काटेकोर पालन आणि वाहतूक व्यवस्थेत सुधारणा करण्यासाठी अतिरिक्त पोलिस कर्मचारी रस्त्यावर तैनात केले जाणार आहेत.

नोटीस कशी मिळणार?

प्रलंबित ई-चलन असलेल्या वाहनमालकांना नोंदणीकृत मोबाईल क्रमांकावर अधिकृत ‘MHPECH-G’ शॉर्ट कोडवरून एसएमएसद्वारे नोटीस पाठविण्यात येईल. या नोटिसा २६, २७, २८ फेब्रुवारी आणि १ मार्च २०२६ या कालावधीतच पाठविण्यात येणार आहेत. या तारखांव्यतिरिक्त येणारे संदेश संशयास्पद समजावेत, असे आवाहन करण्यात आले आहे.

दंड न भरल्यास काय?

३० दिवसांत रक्कम न भरल्यास ड्रायव्हिंग लायसन्स निलंबनाचा प्रस्ताव RTO कडे

संबंधित प्रकरण न्यायालयात दाखल करण्याची प्रक्रिया

पुढील कायदेशीर कारवाई

दंड भरण्याचे पर्याय

अधिकृत संकेतस्थळावरून ऑनलाइन पेमेंट

PTP अॅपद्वारे थेट भरपाई

जवळच्या वाहतूक विभाग कार्यालयात ई-चलन मशीनवर क्यूआर कोड, डेबिट/क्रेडिट कार्डद्वारे भरणा

सायबर फसवणुकीपासून सावध

वाहतूक पोलिसांकडून कोणतीही APK फाइल पाठवली जाणार नाही. ओटीपी किंवा वैयक्तिक माहिती कोणालाही देऊ नये. केवळ अधिकृत पद्धतींचाच वापर करावा. संशयास्पद लिंक, कॉल किंवा संदेश आल्यास त्वरित जवळच्या पोलिस ठाण्यात संपर्क साधावा.वाहतूक नियमांचे पालन करून दंड वेळेत भरावा आणि संभाव्य कायदेशीर कारवाई टाळावी, असे आवाहन वाहतूक विभागाने केले आहे.