पुणे : पुणे शहर पोलीस यांच्या गुन्हे शाखेअंतर्गत खंडणी विरोधी पथक १ ने मोठी कारवाई करत सराईत गुन्हेगाराकडून गावठी पिस्टल व जिवंत काडतुसे जप्त केली आहेत. ही कारवाई आंबेगाव पठार परिसरात करण्यात आली.खंडणी विरोधी पथक १ चे अधिकारी व अंमलदार पुणे शहर आयुक्तालय हद्दीत विना परवाना शस्त्र बाळगणारे, रेकॉर्डवरील पाहिजे व फरारी आरोपींचा शोध घेत पेट्रोलिंग करत होते. त्यावेळी पोलीस हवालदार सचिन माळवे व पोलीस शिपाई दयानंद तेलंगे यांना गुप्त बातमीदारामार्फत माहिती मिळाली की, भारती विद्यापीठ पोलीस ठाणे हद्दीतील रेकॉर्डवरील आरोपी संकेत चोरघे याच्याकडे पिस्टल आहे.
मिळालेल्या माहितीनुसार संकेत चोरघे हा सर्वे नं. १६/१, आंबेगाव पठार, साई सिध्दी अपार्टमेंट येथे वास्तव्यास असून त्याचे आंबेगाव पठार, तुकाई दर्शन व सिंहगड कॉलेज परिसरात येणे-जाणे असल्याचे समोर आले. २४ फेब्रुवारी २०२६ रोजी तो सिंहगड कॉलेज कॅम्पस, वडगाव बु. येथे आल्याची माहिती मिळताच पथकाने सापळा रचला; मात्र तो दुचाकीवरून पसार झाला.त्यानंतर पोलिसांनी रात्रभर सापळा लावून २५ फेब्रुवारी २०२६ रोजी आंबेगाव पठार येथून संकेत गौरख चोरघे (वय २३) याला ताब्यात घेतले. त्याच्याकडून १ गावठी पिस्टल व मॅगझिनमध्ये १ जिवंत काडतूस असा एकूण ३५ हजार २०० रुपये किमतीचा मुद्देमाल जप्त करण्यात आला.
या प्रकरणी भारती विद्यापीठ पोलीस स्टेशन येथे गु.र.नं. ७२/२०२६ अन्वये आर्म अॅक्ट कलम ३ (२५) तसेच महाराष्ट्र पोलीस कायदा कलम ३७ (१)(३) सह १३५ प्रमाणे गुन्हा दाखल करण्यात आला असून पुढील तपास सुरू आहे.ही कारवाई अपर पोलीस आयुक्त (गुन्हे) पंकज देशमुख, पोलीस उप आयुक्त (गुन्हे) निखील पिंगळे व सहायक पोलीस आयुक्त (गुन्हे शाखा) शंकर खटके यांच्या मार्गदर्शनाखाली पोलीस निरीक्षक विश्वजीत काईगडे यांच्या सूचनेनुसार सहायक पोलीस निरीक्षक राजेश माळेगावे व त्यांच्या पथकाने यशस्वीरीत्या पार पाडली.
