पुणे : गुन्हे शाखा युनिट ७ कडून वाघोली परिसरात अवैध दारू हातभट्टीविरोधात मोठी कारवाई करण्यात आली. मौजे भावडी (ता. हवेली) येथील तांबे यांच्या क्रशर प्लांटजवळ सुरू असलेली गावठी हातभट्टी उद्ध्वस्त करून सुमारे ६ लाख ३५ हजार ५७० रुपयांचा मुद्देमाल जप्त करण्यात आला आहे.
पोलीस अंमलदार नितीन धाडगे आणि प्रतिक्षा पानसरे यांना मिळालेल्या गोपनीय माहितीनुसार ही कारवाई करण्यात आली. पोलीस निरीक्षक संतोष सोनवणे (गुन्हे शाखा, युनिट ७) यांच्या पथकाने घटनास्थळी छापा टाकला असता आरोपी महिला अनिशा योगेश गुडदावत (वय २०, रा. ५ नंबर भावडीता, ता. हवेली, जि. पुणे) ही हातभट्टीची राखण करताना आढळून आली.
चौकशीत तिने पतीच्या मदतीने होळी सणाच्या निमित्ताने गावठी दारू तयार करून विक्रीसाठी भट्टी लावल्याची कबुली दिली. छाप्यात १८,१२२ लिटर तुरटी व गुळमिश्रित कच्चे रसायन (अंदाजे किंमत रु. ६,३४,२७०) तसेच इतर साहित्य (रु. १,३००) असा एकूण रु. ६,३५,५७० किमतीचा मुद्देमाल जप्त करण्यात आला.
या प्रकरणी वाघोली पोलीस स्टेशन येथे गु.र. नं. १३२/२०२६ दाखल करण्यात आला असून महाराष्ट्र दारूबंदी कायदा कलम ६५ (फ), (ब), (क), (ई) अन्वये गुन्हा नोंदविण्यात आला आहे. पुढील तपास वाघोली पोलीस करत आहेत.ही कारवाई अप्पर पोलीस आयुक्त (गुन्हे) पंकज देशमुख, पोलीस उपआयुक्त (गुन्हे) निखिल पिंगळे, सहायक पोलीस आयुक्त (गुन्हे २) राजेंद्र मुळीक यांच्या मार्गदर्शनाखाली करण्यात आली. कारवाईत पोलीस निरीक्षक संतोष सोनवणे यांच्यासह गुन्हे शाखा युनिट ७ चे अधिकारी व कर्मचारी सहभागी होते.
