कोल्हापूर – जिल्ह्यातील प्रसिद्ध ज्योतिबा मंदिर परिसरात काल धक्कादायक घटना घडली. परिते गावातील काही भाविक दर्शनासाठी मंदिरात गेले असताना, 15 ते 20 पुजाऱ्यांनी त्यांच्यावर लाथा-बुक्क्यांनी हल्ला केला. या मारहाणाचा व्हिडिओ सोशल मीडियावर व्हायरल झाला असून त्यात पुजाऱ्यांनी भाविकांच्या डोक्यात नारळही फोडल्याचे दिसते.
सध्या कोडोली पोलिस ठाण्यात या प्रकरणी 30 जणांविरुद्ध गुन्हा दाखल करण्यात आला आहे, ज्यात 15 पुजारी आणि 15 भाविकांचा समावेश आहे. घटनास्थळी परिते गावातील नागरिकही आक्रमक झाले आणि त्यांनी या घटनेचा निषेध करत गावात फेरी काढली.
परिते गावचे सरपंच मनोज पाटील यांनी सांगितले की, काही नागरिकांनी मद्यप्राशन केल्याचा आरोप खोडून काढत, ही मारहाण पुजाऱ्यांकडून सुरू करण्यात आली. घटनेमुळे भाविकांमध्ये संतापाची लाट आहे, तसेच मंदिरातील शांतता आणि पवित्रतेवर प्रश्नचिन्ह उपस्थित झाले आहे.
ज्योतिबा देवाची चैत्र यात्रा उद्यापासून सुरू होणार आहे. त्यामुळे पोलीस प्रशासन या प्रकरणाकडे विशेष लक्ष देत तपास करत आहे आणि योग्य कारवाई करण्याची तयारी करत आहे.
