आंध्र प्रदेश : आंध्र प्रदेशातील मार्कापुरम जिल्ह्यातील रायवरम परिसरात आज पहाटे भीषण रस्ता अपघात झाला. खासगी ट्रॅव्हल बसने डंपरला जोरदार धडक दिल्यानंतर बसला आग लागली आणि त्यात 13 प्रवाशांचा जळून मृत्यू झाला. या घटनेमुळे परिसरात मोठी खळबळ उडाली आहे.
मिळालेल्या माहितीनुसार, हरिकृष्णा ट्रॅव्हल्सची बस तेलंगणातील निर्मल येथून नेल्लोरकडे निघाली होती. पहाटे सुमारे 6 वाजण्याच्या सुमारास हा अपघात घडला. धडकेनंतर बसने पेट घेतला आणि आग विझवण्यासाठी जवळपास तीन तास लागले.
या अपघातात डंपर चालकासह 22 जण जखमी झाले असून त्यांना तातडीने रुग्णालयात दाखल करण्यात आले आहे. बसमध्ये एकूण 35 प्रवासी प्रवास करत होते, अशी माहिती पोलिसांनी दिली.दरम्यान, या दुर्घटनेबद्दल मुख्यमंत्री एन. चंद्रबाबू नायडू यांनी तीव्र दुःख व्यक्त केले असून, जखमींना सर्वोत्तम उपचार देण्याच्या सूचना अधिकाऱ्यांना दिल्या आहेत. अपघाताचे नेमके कारण शोधण्यासाठी पोलिसांकडून तपास सुरू आहे.
