पुणे : पुणे शहरातील गजबजलेल्या आप्पा बळवंत चौक (एबीसी) परिसरात मंगळवारी सकाळी एक धक्कादायक अपघात घडला. पुणे महानगर परिवहन महामंडळाची (PMPML) एक बस नियंत्रण सुटल्याने रस्त्यालगत असलेल्या दुकानात जाऊन धडकली. या घटनेत कोणतीही जीवितहानी झाली नाही, मात्र दुकानाचे मोठे आर्थिक नुकसान झाले आहे.
माहितीनुसार, सकाळच्या वर्दळीच्या वेळेत ही बस वेगात जात असताना अचानक चालकाचे नियंत्रण सुटले. बसने मार्ग बदलत थेट दुकानाच्या दर्शनी भागावर जोरदार धडक दिली. या अपघातात दुकानातील काचा, फर्निचर आणि विक्रीसाठी ठेवलेला माल मोठ्या प्रमाणात नुकसानग्रस्त झाला.
घटनेच्या वेळी दुकानासमोर किंवा आत नागरिक नसल्याने मोठा अनर्थ टळला. मात्र, या अपघातामुळे परिसरात काही काळ भीतीचे वातावरण निर्माण झाले होते. संबंधित दुकानदाराने लाखो रुपयांचे नुकसान झाल्याची माहिती दिली आहे.
दरम्यान, बस चालकाने प्राथमिक चौकशीत ब्रेक निकामी झाल्यामुळे वाहनावर नियंत्रण राहिले नसल्याचा दावा केला आहे. तथापि, अपघाताचे नेमके कारण तांत्रिक बिघाड होते की मानवी चूक, याचा तपास सुरू आहे.घटनेची माहिती मिळताच पोलिसांनी तातडीने घटनास्थळी धाव घेत परिस्थिती नियंत्रणात आणली. अपघातानंतर काही काळ वाहतुकीवर परिणाम झाला होता.
