पहलगाम : पहलगामच्या हल्ल्याला एक वर्ष पूर्ण होत असून त्या हल्ल्याचा परिणाम अद्यापही पर्यटनावर दिसून येत आहे. स्थानिकांमध्ये अजूनही भीतीचं वातावरण असल्याचं दिसत आहे.  22 एप्रिल 2025 रोजी झालेल्या पहलगाम दहशतवादी हल्ल्याला आज एक वर्ष पूर्ण होत आहे. बैसरन खोऱ्यात घडलेल्या या भीषण घटनेने संपूर्ण देश हादरला होता. 25 पर्यटक आणि एका स्थानिक नागरिकावर झालेल्या गोळीबारात अनेक निष्पाप जीव गेले. वर्ष उलटलं असलं तरी त्या घटनेच्या जखमा अजूनही ताज्याच आहेत.

हल्ल्यावेळी उपस्थित असलेले स्थानिक गाईड नजाकत अली आजही त्या दिवसाची आठवण सांगताना भावूक होतात. त्यांच्या मते, अचानक सुरू झालेल्या गोळीबारामुळे पर्यटकांमध्ये प्रचंड घबराट पसरली होती. “त्या क्षणी स्वतःचा जीव वाचवण्यापेक्षा पर्यटकांना सुरक्षित ठिकाणी नेणं महत्त्वाचं वाटलं,” असं त्यांनी सांगितलं.

दरवर्षी एप्रिल-मे महिन्यात पर्यटकांनी गजबजलेलं पहलगाम यंदा मात्र काहीसं ओस पडलं आहे. हल्ल्यानंतर पर्यटकांची संख्या मोठ्या प्रमाणात घटली असून, भीतीचं वातावरण अद्यापही कायम असल्याचं दिसून येतं.

याचा मोठा फटका स्थानिक व्यावसायिकांना बसला आहे. हॉटेल, टॅक्सी, गाईड सेवा अशा पर्यटनावर आधारित व्यवसायांवर परिणाम झाला असून, सध्या केवळ 40 टक्केच पर्यटक येथे येत असल्याची माहिती स्थानिकांकडून मिळते. कर्ज काढून व्यवसाय सुरू केलेल्या अनेकांना आर्थिक अडचणींना सामोरं जावं लागत आहे.

दरम्यान, परिस्थिती सुधारण्यासाठी प्रशासन आणि स्थानिक संघटना प्रयत्न करत आहेत. बैसरन व्हॅली पुन्हा सुरू करण्याबाबत चर्चा सुरू असून, पर्यटकांचा विश्वास परत मिळवण्यासाठी सुरक्षा व्यवस्था अधिक मजबूत करण्याची मागणी करण्यात येत आहे.

हल्ल्यानंतर सुरक्षा दलांनी दहशतवाद्यांविरोधात कठोर कारवाई केली. विविध ऑपरेशन्सद्वारे संबंधित दहशतवाद्यांचा खातमा करण्यात आला असला, तरी परिसरातील भीती पूर्णपणे दूर झालेली नाही.या हल्ल्यात अनेकांचे प्राण वाचवणाऱ्या नौशाद अली सय्यद शाह यांच्या धाडसाचीही आठवण यावेळी काढली जात आहे. त्यांच्या कुटुंबीयांना राज्य सरकारकडून मदतही देण्यात आली आहे.

एकूणच, पहलगाम पुन्हा उभं राहत असलं तरी त्या काळ्या दिवसाच्या आठवणी अजूनही जिवंत आहेत. पर्यटन हळूहळू सावरत असलं, तरी विश्वास आणि सुरक्षिततेची भावना पूर्णपणे परत येण्यासाठी अजून वेळ लागणार असल्याचं चित्र आहे.