पुणे : पुण्यातील गर्दीच्या दगडूशेठ मंदिर परिसरात हरवलेल्या तीन वर्षांच्या चिमुकलीला MSF जवान कर्मचाऱ्यांनी प्रसंगावधान दाखवत सुखरूप तिच्या आई-वडिलांपर्यंत पोहोचवलं. विश्रामबागवाडा क्षेत्रीय कार्यालयाकडून अतिक्रमण कारवाई सुरू असताना तांबडी जोगेश्वरी मंदिर बोळ परिसरात ही चिमुकली रडताना आढळली होती.
MSF जवान आदित्य माने, प्रतीक करणे आणि मनीषा बांगर यांनी तत्काळ मुलीला ताब्यात घेत तिची विचारपूस केली. मुलीच्या कपाळावरचा गंध आणि हातातील गुलाबाचं फूल पाहून ती मंदिर परिसरात हरवली असावी असा अंदाज घेत तिघांनी श्रीमंत दगडूशेठ मंदिर परिसरात शोधमोहीम सुरू केली. अखेर कर्नाटकच्या बिदर येथून दर्शनासाठी आलेल्या कुटुंबाचा शोध लागला आणि चिमुकलीला सुखरूप आई-वडिलांच्या ताब्यात देण्यात आलं. यामुळे MSF जवानांचं पुणेकरांकडून कौतुक केलं जात आहे.
