पुणे : राज्यातील राजकीय वातावरणात सध्या “कॉकरोच जनता पार्टी” या उपरोधिक चर्चेने चांगलाच जोर धरलेला असतानाच पुण्यातील शिवसेना मध्यवर्ती कार्यालयात घडलेल्या एका घटनेने सर्वांचे लक्ष वेधून घेतले आहे. पुण्यातील शिवसेना भवन येथे स्वच्छता आणि देखभाल मोहिमेअंतर्गत विशेष पेस्ट कंट्रोल मोहीम राबविण्यात आली. या मोहिमेदरम्यान कार्यालय परिसरातील कॉकरोच आणि इतर कीटकांचा बंदोबस्त करण्यात आला.
शिवसेना भवनातील कार्यालयीन परिसर, बैठकीच्या खोल्या, कॉरिडॉर, स्टोअर रूम तसेच सार्वजनिक वापराच्या जागांमध्ये औषध फवारणी करून संपूर्ण परिसर निर्जंतुक करण्यात आला. कार्यालय स्वच्छ, सुरक्षित आणि आरोग्यदायी राहावे यासाठी नियमितपणे अशा मोहिमा राबवल्या जात असल्याची माहिती पदाधिकाऱ्यांनी दिली.
मात्र, या पेस्ट कंट्रोल मोहिमेची वेळ आणि सध्या सुरू असलेल्या “कॉकरोच जनता पार्टी”च्या चर्चांची पार्श्वभूमी यामुळे या प्रकाराकडे अनेकांनी राजकीय उपरोध म्हणून पाहिले. “शिवसेना भवनात कॉकरोचांना जागा नाही,” अशी मिश्कील प्रतिक्रिया काही शिवसैनिकांनी दिल्याने चर्चेला आणखी रंग चढला.
राजकीय वर्तुळात या घटनेची जोरदार चर्चा सुरू असून, विरोधकांकडूनही यावर विविध प्रतिक्रिया व्यक्त होत आहेत. काहींनी हा केवळ नियमित स्वच्छता उपक्रम असल्याचे म्हटले, तर काहींनी यामागे अप्रत्यक्ष राजकीय संदेश असल्याचा दावा केला.
दरम्यान, सोशल मीडियावर या घटनेचे पडसाद मोठ्या प्रमाणावर उमटले आहेत. फेसबुक, एक्स (ट्विटर), इन्स्टाग्राम आणि व्हॉट्सअॅपवर विविध मीम्स, विनोदी पोस्ट आणि उपरोधिक प्रतिक्रिया व्हायरल होत आहेत. “पेस्ट कंट्रोल की पॉलिटिकल कंट्रोल?” अशा आशयाच्या पोस्टही मोठ्या प्रमाणावर शेअर केल्या जात आहेत.
शिवसेना पदाधिकाऱ्यांनी मात्र या सर्व चर्चांकडे फारसे लक्ष न देता, “कार्यालयातील स्वच्छता आणि कार्यकर्त्यांचे आरोग्य आमच्यासाठी महत्त्वाचे आहे. त्यामुळे नियमित देखभाल मोहिमा सुरूच राहतील,” असे स्पष्ट केले.या घटनेमुळे पुण्यातील राजकीय वातावरणात पुन्हा एकदा हलक्याफुलक्या चर्चांना उधाण आले असून, आगामी काही दिवस ही चर्चा आणखी रंगण्याची शक्यता व्यक्त केली जात आहे.
