पुणे : पुण्यात जनगणनेचे काम करणाऱ्या महिला कर्मचाऱ्यावर मारहाण झाल्याची गंभीर घटना समोर आली आहे. महर्षीनगर परिसरातील मीनाताई ठाकरे वसाहतीत जनगणनेसाठी गेलेल्या महिला कर्मचाऱ्याला काही जणांनी शिवीगाळ करत दगडाने तसेच लाथाबुक्क्यांनी मारहाण केल्याचा प्रकार घडला. या प्रकरणी स्वारगेट पोलीस ठाण्यात गुन्हा दाखल करण्यात आला असून पोलिसांकडून पुढील तपास सुरू आहे.
मिळालेल्या माहितीनुसार, संबंधित महिला पुणे महानगरपालिकेत कार्यरत असून सध्या सुरू असलेल्या जनगणनेच्या कामासाठी त्या परिसरात गेल्या होत्या. 27 मे रोजी दुपारी मीनाताई ठाकरे वसाहतीत सर्वेक्षण सुरू असताना काही स्थानिकांनी त्यांच्या कामात अडथळा निर्माण करत वाद घातला. त्यानंतर त्यांना शिवीगाळ करण्यात आली.
यानंतर दुसऱ्या दिवशी महिला कर्मचारी पुन्हा त्या भागात जनगणनेच्या कामासाठी गेल्या असता, मागील वादाच्या रागातून काही जणांनी त्यांच्यावर हल्ला केल्याचा आरोप करण्यात आला आहे. फिर्यादीच्या तक्रारीनुसार, संबंधितांनी त्यांच्या पाठीमागून येत दगडाने मारहाण केली तसेच लाथाबुक्क्यांनी देखील मारहाण केली.
या प्रकरणात विकास मोरे, क्रांती मोरे, मुक्ता कसबे, लीलावती मोरे, अभिजीत मोरे आणि इतर काही अनोळखी महिला व पुरुषांविरोधात गुन्हा दाखल करण्यात आला आहे. घटनेनंतर परिसरात एकच खळबळ उडाली असून स्वारगेट पोलीस पुढील तपास करत आहेत.
