नवी दिल्ली : छत्रपती संभाजीनगरचे रहिवासी आणि ‘कॉकरोच जनता पार्टी’ (CJP) या सोशल मीडिया व्यंगात्मक उपक्रमाचे संस्थापक अभिजीत दीपके 6 जून रोजी अमेरिकेतून भारतात परतणार असून, शिक्षणमंत्र्यांच्या राजीनाम्याच्या मागणीसाठी दिल्लीतील जंतर-मंतर येथे आंदोलन करणार असल्याची घोषणा त्यांनी केली आहे. ‘कॉकरोच इज बॅक’ असा संदेश देत दीपके यांनी सोशल मीडियावर ही माहिती दिली.
सध्या अमेरिकेतील बोस्टन युनिव्हर्सिटीमध्ये पब्लिक रिलेशन्सचे शिक्षण घेत असलेले अभिजीत दीपके यापूर्वी आम आदमी पक्षासाठी सोशल मीडिया रणनीतीकार म्हणून कार्यरत होते. विविध राजकीय आणि सामाजिक विषयांवर भाष्य करणाऱ्या त्यांच्या पोस्टमुळे ते चर्चेत आले आहेत.
दरम्यान, ‘कॉकरोच जनता पार्टी’चे एक्स (पूर्वीचे ट्विटर) खाते राष्ट्रीय सुरक्षेच्या कारणास्तव 21 मे रोजी ब्लॉक करण्यात आले होते. या कारवाईविरोधात दीपके यांनी दिल्ली उच्च न्यायालयात याचिका दाखल केली आहे. न्यायालयाने केंद्र सरकार आणि एक्सकडून उत्तर मागवले असून पुढील सुनावणी 6 जुलै रोजी होणार आहे.
सीजेपी हा राजकीय आणि सामाजिक घडामोडींवर व्यंगात्मक भाष्य करणारा डिजिटल उपक्रम असल्याचा दावा याचिकाकर्त्यांनी केला आहे. खाते पूर्णपणे बंद करण्याऐवजी आक्षेपार्ह पोस्टवरच कारवाई व्हायला हवी, अशी त्यांची भूमिका आहे. सध्या या प्रकरणाकडे राजकीय आणि कायदेशीर वर्तुळाचे लक्ष लागले आहे.
