पुणे : पुणे विधान परिषद स्थानिक स्वराज्य संस्था मतदारसंघासाठी महायुतीचे उमेदवार विक्रम काकडे यांनी आज आपला उमेदवारी अर्ज दाखल केला. यावेळी महायुतीच्या नेत्यांनी आणि कार्यकर्त्यांनी मोठ्या संख्येने उपस्थित राहून शक्तिप्रदर्शन केले.
उमेदवारी अर्ज दाखल करण्याच्या कार्यक्रमाला केंद्रीय राज्यमंत्री मुरलीधर मोहोळ, विधान परिषदेच्या उपसभापती डॉ. नीलम गोऱ्हे, ज्येष्ठ नेते दिलीप वळसे पाटील, उपमहापौर परशुराम वाडेकर, जय पवार यांच्यासह महायुतीचे अनेक पदाधिकारी व कार्यकर्ते उपस्थित होते.
यावेळी बोलताना महायुतीच्या नेत्यांनी विकास, स्थैर्य आणि सर्वसमावेशक नेतृत्वाच्या बळावर विक्रम काकडे यांचा विजय निश्चित असल्याचा विश्वास व्यक्त केला. तसेच स्थानिक स्वराज्य संस्थांच्या प्रतिनिधींकडून त्यांना भक्कम पाठिंबा मिळेल, असेही नेत्यांनी सांगितले. पुणे विधान परिषद निवडणुकीत महायुतीची विजयी वाटचाल सुरू झाल्याचा दावा यावेळी करण्यात आला.
