मुंबई : सोशल मीडियाचा वाढता प्रभाव आणि ट्रॅव्हल व्लॉगिंगची क्रेझ यामुळे अनेक प्रवासी विमानतळावर पोहोचताच सेल्फी, रील्स आणि व्हिडिओ शूट करताना दिसतात. मात्र, एअरपोर्ट परिसरात चित्रीकरण करताना काही महत्त्वाचे सुरक्षा नियम पाळणे आता अधिक आवश्यक झाले आहे.
विमानतळ सुरक्षेशी संबंधित नियमांनुसार, सुरक्षा तपासणी विभाग, बोर्डिंग गेट, रनवे, विमानांच्या हालचालीचे क्षेत्र, एप्रन आणि इतर संवेदनशील ठिकाणी परवानगीशिवाय फोटो किंवा व्हिडिओ काढण्यास मनाई आहे. अशा भागांमध्ये चित्रीकरण केल्यास संबंधित अधिकाऱ्यांकडून कारवाई केली जाऊ शकते.
अधिकाऱ्यांच्या मते, विमानतळावरील सुरक्षा व्यवस्था आणि कार्यपद्धतीची माहिती सार्वजनिक होऊ नये, यासाठी हे निर्बंध लागू करण्यात आले आहेत. सोशल मीडियावर व्हिडिओ आणि रील्स मोठ्या प्रमाणात शेअर होत असल्याने सुरक्षेच्या दृष्टीने अतिरिक्त खबरदारी घेतली जात आहे.
नियमांचे उल्लंघन करणाऱ्या प्रवाशांवर दंडात्मक कारवाई होऊ शकते. काही प्रकरणांमध्ये मोबाईल जप्त करणे, चौकशीसाठी ताब्यात घेणे किंवा भविष्यातील हवाई प्रवासावर निर्बंध घालण्यासारखे निर्णयही घेतले जाऊ शकतात.त्यामुळे विमानतळावर फोटो किंवा व्हिडिओ शूट करण्यापूर्वी संबंधित नियमांची माहिती घेणे आणि सुरक्षा निर्देशांचे पालन करणे आवश्यक असल्याचे प्रशासनाने स्पष्ट केले आहे.
