नवी दिल्ली : ‘कॉकरोच जनता पार्टी’चे संस्थापक आणि अध्यक्ष अभिजीत दीपके अमेरिकेतून भारतात दाखल झाले असून त्यांनी दिल्लीतील जंतर-मंतर येथे आपल्या संघटनेचे पहिले आंदोलन सुरू केले आहे. NEET परीक्षेतील कथित गैरव्यवहारांच्या मुद्द्यावरून केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी या आंदोलनातून करण्यात येत आहे.
काही दिवसांपूर्वी सरन्यायाधीश सूर्यकांत यांनी एका सुनावणीदरम्यान केलेल्या टिप्पणीच्या पार्श्वभूमीवर ‘कॉकरोच जनता पार्टी’ ही सोशल चळवळ चर्चेत आली होती. सोशल मीडियावर मोठा प्रतिसाद मिळाल्यानंतर या चळवळीने आता प्रत्यक्ष आंदोलनाचा मार्ग स्वीकारला आहे.
अभिजीत दीपके आज सकाळी दिल्ली विमानतळावर पोहोचले. त्यांच्या स्वागतासाठी अनेक तरुण विमानतळावर उपस्थित होते. भारतात आगमनानंतर त्यांनी हातात डॉ. बाबासाहेब आंबेडकर यांचे पुस्तक धरलेले फोटो सोशल मीडियावर मोठ्या प्रमाणात व्हायरल झाले आहेत.
जंतर-मंतरवरील आंदोलनस्थळी धर्मेंद्र प्रधान यांचा फोटो असलेली पोस्टर्सही चर्चेचा विषय ठरली. ‘बेटा, तुमसे ना हो पाएगा...’ असा मजकूर असलेल्या पोस्टर्ससह अनेक युवक-युवती आंदोलनात सहभागी झाल्याचे दिसून आले.
दिल्ली पोलिसांनी 6 जून रोजी सकाळी 10 ते सायंकाळी 5 वाजेपर्यंत आंदोलनाची परवानगी दिली आहे. या आंदोलनाला मोठ्या प्रमाणावर तरुणांचा प्रतिसाद मिळत असून अनेकजण याकडे देशातील पहिल्या मोठ्या ‘जेन-झी’ आंदोलनाच्या रूपात पाहत आहेत.
