नवी दिल्ली : शिवसेना (उद्धव बाळासाहेब ठाकरे) पक्षाला मोठा राजकीय धक्का बसला आहे. ठाकरे गटातील सहा खासदारांनी लोकसभा अध्यक्ष ओमप्रकाश बिर्ला यांची भेट घेऊन स्वतंत्र संसदीय गट स्थापन करण्याचा दावा केला आहे. अध्यक्षांकडे आवश्यक कागदपत्रे सादर केल्यानंतर या गटाला मान्यता मिळाल्याची माहिती सूत्रांकडून समोर आली आहे. पुढील टप्प्यात हा गट उपमुख्यमंत्री एकनाथ शिंदे यांच्या नेतृत्वाखालील शिवसेनेत विलीन होण्याची शक्यता व्यक्त केली जात आहे.
मिळालेल्या माहितीनुसार, गेल्या काही दिवसांपासून सुरू असलेल्या राजकीय घडामोडींना बुधवारी निर्णायक वळण मिळाले. संबंधित खासदारांनी दिल्लीत एकत्र येत लोकसभा अध्यक्षांची भेट घेतली आणि स्वतंत्र गट स्थापनेबाबतचे पत्र सादर केले. या प्रक्रियेनंतर त्यांच्या गटाला वैधानिक मान्यता मिळाल्याचे सांगितले जात आहे.
पक्षांतरबंदी कायद्यानुसार, कोणत्याही पक्षातील खासदारांचा स्वतंत्र गट मान्य होण्यासाठी मूळ पक्षाच्या संसदीय संख्याबळातील किमान दोन-तृतीयांश सदस्यांचा पाठिंबा आवश्यक असतो. ठाकरे गटाचे लोकसभेत एकूण नऊ खासदार आहेत. त्यापैकी सहा खासदारांनी स्वतंत्र गट स्थापन केल्यामुळे आवश्यक संख्याबळ पूर्ण झाले आहे.
राजकीय वर्तुळात ‘ऑपरेशन टायगर’ची चर्चा अनेक दिवसांपासून सुरू होती. राष्ट्रीय लोकशाही आघाडी (एनडीए)च्या बैठकीनंतर या हालचालींना वेग आल्याचे बोलले जात आहे. त्यानंतर दिल्लीतील विविध बैठका आणि संपर्क मोहिमांमुळे अखेर सहा खासदारांनी स्वतंत्र भूमिका घेतल्याचे स्पष्ट झाले.
शिंदे गटात जाणाऱ्या खासदारांची नावे
संजय जाधव
संजय देशमुख
नागेश पाटील आष्टीकर
ओमराजे निंबाळकर
भाऊसाहेब वाकचौरे
संजय दिना पाटील
या घडामोडींमुळे महाराष्ट्रातील शिवसेनेच्या राजकारणात पुन्हा एकदा मोठी उलथापालथ होण्याची चिन्हे दिसत असून, आगामी स्थानिक स्वराज्य संस्था आणि विधानसभा राजकारणावर त्याचे दूरगामी परिणाम होण्याची शक्यता व्यक्त केली जात आहे.
