पुणे : दिग्दर्शक प्रवीण तरडे यांच्या बहुचर्चित 'देऊळ बंद 2' या चित्रपटाची लोकप्रियता दिवसेंदिवस वाढत असून, पुण्यात या चित्रपटासाठी एक अनोखा उपक्रम राबविण्यात आला. शरद पवार गटाचे आमदार बापूसाहेब पठारे आणि त्यांचे पुत्र सुरेंद्र पठारे यांनी आपल्या मतदारसंघातील नागरिकांसाठी तब्बल 1500 तिकिटांची खरेदी करत संपूर्ण थिएटरच आरक्षित केले.
विशेष म्हणजे, नागरिकांसाठी आयोजित करण्यात आलेल्या या शोला आमदार बापूसाहेब पठारे स्वतः उपस्थित राहिले आणि मतदारसंघातील नागरिकांसोबत चित्रपटाचा आनंद घेतला. या उपक्रमाबद्दल प्रवीण तरडे यांनी सोशल मीडियावर व्हिडीओ शेअर करत पठारे यांचे आभार मानले.
व्हिडीओमध्ये बोलताना प्रवीण तरडे म्हणाले की, “प्रभागातील नागरिकांसाठी 'देऊळ बंद 2'च्या 1500 तिकिटांची खरेदी करणारे हे पहिले आमदार आहेत. समाजाला सकारात्मक संदेश देणारा चित्रपट लोकांपर्यंत पोहोचवण्याचे काम त्यांनी केले आहे. हा चित्रपट पाहिल्यानंतर अनेकांच्या विचारांमध्ये बदल होईल, असा विश्वास आहे.”
दरम्यान, 21 मे रोजी प्रदर्शित झालेल्या 'देऊळ बंद 2' चित्रपटाला प्रेक्षकांचा उत्स्फूर्त प्रतिसाद मिळत आहे. चित्रपटाने बॉक्स ऑफिसवर दमदार कामगिरी करत अनेक विक्रम आपल्या नावावर केले आहेत. चित्रपटात मोहन जोशी यांनी श्री स्वामी समर्थ यांची भूमिका साकारली असून, स्नेहल तरडे, रमेश परदेशी, सविता मालपेकर आणि मंगेश देसाई यांनीही महत्त्वपूर्ण भूमिका साकारल्या आहेत.पुण्यातील या विशेष शोमुळे 'देऊळ बंद 2'च्या लोकप्रियतेत आणखी भर पडली असून, चित्रपटाची चर्चा सर्वत्र रंगली आहे.
