पुणे : गेल्या काही दिवसांपासून गुन्हेगारीच्या घटनांमध्ये वाढ होत आहे. क्षुल्लक कारणांवरून खून, खुनाचा प्रयत्न आणि महिलांवरील अत्याचाराच्या घटना लक्षणीय आहेत. असे असताना आता पुण्याच्या खराडी येथे पतीने पत्नीची शिलाई मशीनच्या कात्रीने वार करून हत्या केली. इतकेच नाहीतर या हत्येचा व्हिडिओ त्याने रेकॉर्डही केल्याचा धक्कादायक प्रकार समोर आला.

ज्योती शिवदास गिते (वय 28, रा. तुळजाभवानीनगर, खराड) असं खून झालेल्या महिलेचे नाव आहे. तर शिवदास तुकाराम गिते (वय 37) असे नराधम पतीचे नाव आहे. या घटनेनंतर पोलिसांनी आरोपीला अटक केली आहे. शिवदास गिते याने कात्रीने वार करत पत्नीचा गळा चिरला. यातील धक्कादायक बाब म्हणजे ज्यावेळी आरोपी शिवदासने पत्नीवर कात्रीने वार केला, तेव्हा त्याचा लहान मुलगा खुर्चीवर समोरच बसला होता. हत्या केल्यानंतर आरोपीनं तिचा व्हिडिओ देखील काढला आहे. साधारणपणे हा साडेतीन मिनिटांचा व्हिडिओ असल्याची माहिती देण्यात येत आहे.

दरम्यान, या हत्येप्रकरणानंतर आरोपी शिवदास याला पोलिसांनी तातडीने अटक केली. त्यानंतर पत्नीच्या हत्येची कबुली दिली. आरोपी स्वत: पोलीस ठाण्यात हजर झाला आहे. या प्रकरणी चंदननगर पोलीस ठाण्यात गुन्हा दाखल करण्यात आला आहे. पोलिसांनी आरोपीला अटक केली आहे.

आरोपी मूळचा बीडचा रहिवासी

आरोपी पती शिवदास गिते मूळचा बीडमधील रहिवाशी आहे. तो न्यायालयात टंकलेखक म्हणून काम करतो. तुळजाभवानीनगर भागात तो भाडेतत्त्वावर खोली घेऊन राहत होता. गेल्या काही दिवसांपासून गिते दाम्पत्यात कौटुंबिक कारणावरून वाद व्हायचे. बुधवारी पहाटे पत्नी ज्योती आणि तिचा पती शिवदास यांच्यात वाद झाले. त्यानंतर शिवदासने घरातील कात्रीने ज्योतीच्या गळ्यावर वार केले. शिवदासने केलेल्या हल्ल्यात पत्नी गंभीर जखमी झाली. यावेळी त्यांचा सहा वर्षांचा मुलगाही तिथे होता.