नवी दिल्ली- माजी केंद्रीय कृषीमंत्री शरद पवार यांच्या हस्ते महादजी शिंदे राष्ट्रीय गौरव पुरस्कार उपमुख्यमंत्री एकनाथ शिंदे यांना प्रदान करण्यात आल्यानं शिवसेनेचे (यूबीटी) खासदार संजय राऊत संतप्त झाले. "पवारसाहेब आम्हालाही राजकारण कळते," असा टोला खासदार राऊत यांनी शरद पवारांना लगावला. ते दिल्लीत माध्यमांशी बोलत होते.

खासदार संजय राऊत म्हणाले, " शरद पवारांनी शिंदेचा नाही तर महाराष्ट्राचे तुकडे करणाऱ्या अमित शाहांचाच सत्कार केला. गद्दारांना असे सन्मान देणे म्हणजे महाराष्ट्राच्या अस्मितेला धक्का आहे. पवारांनी शिंदेच्या कार्यक्रमाला जायला नको होतं. राज्याचं राजकारण विचित्र दिशेनं चाललं आहे. ठाण्याचा विकास हा शिवसेनेनं केला. शरद पवारांना ठाण्याबाबत चुकीची माहिती आहे. पवारांबाबत आम्ही आमच्या पक्षाच्या भावना मांडल्या आहेत. दिल्लीमध्ये साहित्य संमेलन नाही तर राजकीय दलाली सुरू आहे. आता शिंदेसारखे आंतरराष्ट्रीय दलाल पवार साहेबांसोबत आहेत."

"माझा साहित्य संमेलन आयोजकांना सवाल आहे. तुम्ही मराठीची काय सेवा करत आहात? मराठीच्या मानेवर पाय देणाऱ्यांचा सत्कार होत आहे. मला साहित्य संमलेनाचा निमंत्रण दिलेलं आहे. पण, मी संमेलनाला जाणार नाही. आयोजकांना पैशाची कमतरता असेल तर त्यांनी महाराष्ट्रात यायला हवं होतं. त्यांना लोकवर्गणी करून पैसे दिले असते. पंतप्रधान मोदींच्या हस्ते साहित्य संमेलनाच्या हस्ते होणार आहे. त्यांनीदेखील मी पत्र लिहिणार आहे. दिल्लीच्या राजधानीत महाराष्ट्राचा घोर अपमान होत आहे, अशी टीका खासदार राऊत यांनी केली.

पुढे राऊत म्हणाले, " शरद पवारांनी कार्यक्रमाला जायला नको होते, ही आमची भावना आहे. महाराष्ट्रातील लोकांसमोर आम्ही कोणत्या तोंडानं जाणार? राजकारणात कुणी कोणाचा मित्र, शत्रू नसतो, ही ठीक आहे. पण, ज्यांनी महाराष्ट्राची वाट लावली, ज्यांना आपण महाराष्ट्राचे शत्रू मानतो, त्यांना हातून पुरस्कार देणं हा राज्याच्या अस्मितेला धक्का आहे. शिवसेना तोडून महाराष्ट्र कमजोर केलेल्यांचा तुम्ही सन्मान केला. त्यामुळे महाराष्ट्राला नक्कीच वेदना झाल्या आहेत. आम्हाला तुमचं दिल्लीतील राजकारण कळतं. पण, काही गोष्टी राजकारणात टाळायच्या असत्या. अजित पवारांबरोबर तुमचं गुफ्तगू हे वैयक्तिक किंवा कौटुंबिक कारणानं होत असेल. तरी त्यांनी राष्ट्रवादी फोडल्यानं आम्ही आमचं भान टाकून पावले टाकत असतो."

माजी केंद्रीय कृषीमंत्री शरद पवार यांच्या हस्ते उपमुख्यमंत्री एकनाथ शिंदे यांना महादजी शिंदे राष्ट्रीय गौरव पुरस्कार मंगळवारी दिल्लीत प्रदान करण्यात आला. या कार्यक्रमात महाविकास आघाडीत सहभागी असलेल्या शरद पवारांनी महायुतीचे नेते एकनाथ शिंदेंवर स्तुतीसुमने उधळली. ते म्हणाले, "एकनाथ शिंदे हे अलिकडच्या काळातील नागरी प्रश्नांची जाण असणारे नेते आहेत. त्यांनी ठाणे महापालिका, नवी मुंबई महापालिका तसेच राज्याचे मुख्यमंत्री म्हणून योग्य दिशा देण्याचं काम केलं. पक्षापुरता मर्यादित विचार न करता सर्व पक्षांच्या नेत्यांशी सुसंवाद ठेवून राज्याचे आणि जनतेचे प्रश्न सोडविले. त्यांच्या कामांची महाराष्ट्राच्या इतिहासात निश्चितपणं नोंद होईल."